Құрметті қонақтар арасында ҚР Президенті Әкімшілігінің, ҚР Тұңғыш Президенті – Елбасы Кеңсесінің, ҚР Парламентінің депутаттық корпусының, Ресей Елшілігінің, Қазақстандағы Россотрудничество өкілдігі және ММУ қазақстандық филиалының әр жылдардағы түлектері, оқытушылар, студенттер болды.
Салатанатты жиында Қазақстан Республикасының Мемлекеттік хатшысы Қырымбек Көшербаев ҚР Тұңғыш Президенті – Елбасы Нұрсұлтан Назарбаевтың құттықтау хатын оқып берді.
«М. В. Ломоносов атындағы ММУ Қазақстан филиалының ұжымына! Сіздерді М. В. Ломоносов атындағы Мәскеу мемлекеттік университетінің Қазақстан филиалының құрылғанына 20 жыл толуымен құттықтаймын. Менің бастамам бойынша және РФ Президенті В.В. Путиннің қолдауымен құрылған бұл жоғары оқу орны – қос елдің достығы мен стратегиялық әріптестігінің жарқын үлгісі болды. Мен 1994 жылы Еуразиялық одақты құру идеясын да Мәскеу университетінде айтқан едім. Ал қазір оның филиалы Еуразияның орталығында табысты қызмет етуде», дейді Н. Назарбаев.
Өз сөзінде Елбасы филиал түлектерінің Тәуелсіздіктің 30 жылдығын атап өтіп жатқан Қазақстанның дамуы мен гүлденуіне лайықты үлес қосып жүргендерін атап өтті.
«Заманауи және кеңінен ойлайтын мамандарды дарялау және бірлескен ғылыми зерттеулер жүргізу отандық жоғары білім көшбасшыларының бірі ретінде ЖОО әлеуетін одан әрі өсіруге ықпал етеді. ММУ Қазақстан филиалының ұжымына еліміздің игілігі үшін жаңа табыстар мен жетістіктер және Қазақстан-Ресей ынтымақтастығын әрі қарай ілгерілетуді тілеймін», деді Н. Назарбаев.
Айта кетейік, М. В. Ломоносов атындағы ММУ Қазақстан филиалы ҚР Тұңғыш Президенті - Елбасы Нұрсұлтан Назарбаевтың бастамасымен және РФ президенті Владимир Путиннің қолдауымен құрылған.
2000 жылғы 9 қазанда Ресей Федерациясының Президенті В.В. Путиннің Қазақстан Республикасына жасаған мемлекеттік сапарында ММУ ректоры, академик В.А. Садовничий мен ҚР Білім және ғылым министрі Қ.Е.Көшербаев Астана қаласында Л.Н.Гумилев атындағы Еуразиялық ұлттық университеттің базасында М.В. Ломоносов атындағы Мәскеу мемлекеттік университетінің Қазақстан филиалын құру туралы хаттамаға қол қойған болатын.
