Ескі көліктерді жоюға қабылдау бағдарламасы іске қосылған уақыттан бері қазақстандықтардан барлығы 214 932 көлік қабылданды.
Ауылшарушылық техникасы бойынша бүгінгі таңда 3 206 техника тапсырылды. Оның 2 348-і трактор, 858-і комбайн. 2021 жылы агротехникаларды қабылдауға барлығы 3 380 квота бөлінген болатын.
Бағдарлама аясында жеңіл автокөліктерге 210 мың, жолаушы және жүк көліктерінің санатына қарай 420 мыңнан 630 мың теңгеге (126-216 АЕК) дейін бағаланады. Агротехниканы тапсырушыларға 560 мыңнан 2 млн теңгенің жеңілдік сертификаты беріледі.
Жеңілдік сертификаты бағдарламасы бойынша 54 834 автокөлік қабылданды. Аталған бағдарламаның нәтижесінде отандық өндірушіден 29 853 жаңа автокөлік сатып алынды.
Айта кету керек, жоюға тапсырылған көліктердің басым бөлігі 1970-90 жылдары шыққан машиналарды құрап отыр.
Аймақтар бойынша көлік тапсырудың үздік бестігін Шымкент, Алматы, Тараз, Қарағанды, Павлодар қалалары бастап тұр.
Еске салайық, 2021 жылдың 1 желтоқсанынан бастап жеңіл, жолаушы және жүк көліктерін қабылдау уақытша тоқтатылды. Себебі, биылға межелі квота толығымен игеріліп отыр. Ал ауыл шаруашылығы техникасы электронды кезекке сәйкес жыл соңына дейін қабылданады. Ескі көліктерді қабылдауға қажетті квота бөлінгеннен кейін 2022 жылдың қаңтар айынан бағдарлама қайта іске қосылады деп күтілуде, деп хабарлады ӨКМ Операторының баспасөз қызметі.
