Ас атасы

Нан – тоқшылық, баршылық белгісі. Дастарқанның төрінде тұрған нан, тіпті, нанның иісінің өзі адамның көңілін хош етеді емес пе? Осы аптада Шым-қала тұрғындарының дастарқаны молшылыққа, берекеге кенеле түсті. «Атамекен корпорациясы» ЖШС-нің жер жыртып, егін егіп, диірмен тартумен айналысып келе жатқанына көп жылдың жүзі болды. Адал еңбектерінің арқасында елдің алғысына бөленген бұл серік­тестік осы аптада нан зауытын іске қосып, ас атасының түр-түрін шығаруды қолға алды. Жобаның құны 2,5 млн. АҚШ долларын құрайды және 50 жа­ңа жұмыс орнын ашуға мүмкін­дік беріп отыр. Зауыттағы бар­лық құрал-жабдықтар шведтер елінен әкелінген. Бұрын-соң­ды Оңтүстікте шетелдің мұн­дай озық үлгілі жабдықтары пай­да­ланылмаған. Жалпы алғанда, кәсіп­орын тұтынушылар үшін барлық жағдайды жасауда. Шырайлы қаланы нанмен қамтамасыз ету үшін 10 «Мерседес Спринтер» кө­лігі сақадай-сай тұр. Осы көліктер ар­қылы қаладағы азық-түлік дү­кендерінің 50-60 пайы­зына нан жеткізіледі. «Бұл нан зауыты тәулігіне 50 тонна ұнды қажет етеді. Біздің бас­ты мақсатымыздың бірі – әлеу­меттік нанның бағасын тұрақты ұстап тұру. Бағаның аспандамауына көп септігіміз тиеді деп ойлаймын. Өйткені, ұн өзімізден шығады және оның тасымалдануы­на көп ақша кетпейді. Дәл қазір біздің зауыттан көтерме бағамен сатып аламын дегендер болса, әр бөлке нанды 25-28 теңге арасында беруге дайынбыз. Содан болар, күн сайын тапсырыстың саны артып келе жатыр», дейді «Атамекен корпорациясы» ЖШС-нің директоры Мұрат Төлтебаев. Ал, Оңтүстік Қазақстан облысы әкімінің орынбасары Сапарбек Тұяқбаев зауыттың заманауи технологиясына тәнті болғанын жасыра алмады. «Зауыттың тәулігіне 150 мың дана нан шығаруға мүм­кіндігі бар. Өте қымбат жаб­дықтармен жұмысын бастап отыр­ған алғашқы кәсіпорын. Бұл шетелдік жабдықтардың ең басты ерек­шелігі – энергияны үнемдейді. Бұл, әрине, шығынды азайтатыны анық. Зауыт нанды барлық талап­тарға сай шығарып отыр, арнайы зертханасы бар», дейді Сапарбек Құрақбайұлы. Бір сөзбен айтқанда, барлық талапқа сай бұл зауыт әр үйге тоқ­шылық, береке сыйлай бермек. Оралхан ДӘУІТ, «Егемен Қазақстан». Оңтүстік Қазақстан облысы. Суреттерді түсірген Арман ӘБДІРАШҰЛЫ.