![Елордада жаңа жылдық кештерге тыйым салынды](/media/2021/12/23/shyrsha.jpg)
15 желтоқсаннан бастап елорда эпидемиологиялық жағдайды бағалау матрицасына сәйкес «жасыл» аймақта болды. Алайда, бүгінгі таңда коронавирустың даму қарқыны бойынша Rt репродуктивті саны-1,019 құрады, соған сәйкес Нұр-Сұлтан қаласы «сары» аймаққа өтті.
Rt репродуктивті көрсеткіші - аймақтарды анықтау критерийлерінің бірі. Апталық аурушаңдықты салыстыра отырып, шамалы өсім байқалды, сондықтан бір апта ішінде COVID-19-дың 564 жағдайы тіркелді (алдыңғы апта – 542 жағдай). Коронавируспен сырқаттанудың қарқынды көрсеткіші тиісінше 47,5 және 45,6 құрады, яғни сырқаттану көрсеткіші алдыңғы аптадан 4% жоғары болды. Бұл Rt санының 1-ден жоғары өсуіне және «жасыл» аймақтан «сарыға» аймаққа ауысуына әкеп соқты.
Бір тәулік ішінде алғашқы зертханалық расталған 85 жағдай тіркелді (симптомдары бар 58 жағдай, 27 симптомсыз жағдай), өсім – 0,05%. Аурудың көбеюінің негізгі себептері - әдеттегідей мереке күндері кейбір тұрғындардың карантин шектеулерін сақтамауы. Яғни, адам көп жиналатын жерлерге баруынан, бетперде тақпай жүруінен, науқастардың да, жақын байланыста болған адамдардың да үй карантині режимін сақтамауынан болды.
Таралу қаупін және әдеттегідей мереке күндерінен кейін коронавирустың оң жағдайларын тіркеу санының артуын ескере отырып, сыйымдылығы 50% дейін, бірақ 70 орыннан аспайтын, келушілер мен ондағы қызметкерлерде тек «жасыл» мәртебе болатын «Ashyq» жобасына қатысатын объектілерді санамағанда, өткізілетін жаппай іс-шараларға, оның ішінде отбасылық, корпоративтік іс-шараларға тыйым салынады.
Сондай-ақ, түрлі топтар мен ұйымдар балаларының қатысуымен жалпымектептік және ұжымдық таңертенгіліктерді ұйымдастыруға және өткізуге тыйым салынады. Алдағы мереке күндері мониторинг топтарының жұмысы күшейтілмек.
Сауда және басқа да объектілердің иелері карантинді бұзбауға, барлық санитарлық нормаларды сақтауға тиіс.
Нұр-Сұлтан қаласының санитариялық-эпидемиологиялық бақылау департаменті өткен мереке күндері халықтың басым көпшілігі карантиндік шараларды сақтаған жағдайда, елорданың «сары» аймаққа өтуіне жол бермеуге болатынын хабарлайды. Алайда, бәрі бірдей жауапкершілік таныта қоймады, осылайша елорданың ұзақ 7 ай бойы (10 наурыздан 26 қазанға дейін) тұрған «қызыл» аймаққа жақындау қаупін арттырды.
«Алдағы жаңажылдық мерекелер эпидемиологиялық жағдайдың нашарлауына және коронавирус инфекциясының көбеюіне әкелмеуі керек екенін есте ұстаған жөн. Ал ол біздің жүріс-тұрысымыз бен карантин шараларын сақтаудағы жауапкершілігімізге байланысты. Сондықтан, қала тұрғындарын жаңа жылды туыстарымен бірге кішігірім ортада ғана қауіпсіз атап өтуге шақырамыз», деп ескертеді санитарлық-эпидемиологиялық бақылау комитеті.