Ел басына ауыртпалық түскен кезеңдерде де ұлттың үш бәйтерегі халыққа қорған бола білді. Ұлы тұлғаларды ұлықтау мақсатында ел Тәуелсіздігінің 30 жылдығына орай, Тараз қаласында үш бидің ескерткіші ашылды. Алып ескерткіш Жамбыл облыстық соты ғимаратының алдында орналасқан.
Ескерткіштің ашылу салтанатына облыс әкімі Бердібек Сапарбаев, сот саласының ардагерлері мен облыстық сот төрағасы Ербол Ахметжанов қатысты. Жиында Ербол Ахметжанов пен ардагер Мұсабек Тұрғанбекұлы ең күрделі кезеңде қазақтарды біріктіруде шешуші рөл атқарып, елдің еркіндігі мен тәуелсіздігі үшін күрескен ұлы билердің өнегелі өмір жолына тоқталды. «Қазақ билерінің əділ сот ісін дамытуға жəне нығайтуға қосқан үлесі өлшеусіз. Төле би, Қазыбек би, Әйтеке бидің қазақ халқының қалыптасуына өлшеусіз үлес қосқанын, еңбектерінің сот төрелігімен тығыз байланысты болғанын атап өткеніміз абзал. Ескерткіш даналық пен әділдіктің нышаны», деді Мұсабек Тұрғанбекұлы. Өз сөзінде Бердібек Сапарбаев әр заманның өзіне сай сот жүйесі болғанын, кезіндегі Билер кеңесі соның айғағы екендігін, Төле би, Әйтеке би, Қазыбек би есімдері қазақ мемлекеттілігі мен қазақ сот төрелігі негізімен тығыз байланысты екенін атап өтті. Бұдан кейін келушілер үш бидің еңселі ескерткішіне гүл шоқтарын қойып, бабалар рухына тағзым етті.
Көне шаһарда бой көтерген жаңа ескерткіш бетоннан құйылып, мәрмәр тұғырға орнатылған. Монумент авторы – танымал мүсінші Темірхан Қолжігіт. Ескерткіштің биіктігі 3,50 метрді құрайды.
Жамбыл облысы
