Соңғы жылдары ел ішінде ізгілік шарапаты мол «Ел үлесі – пәтерге» бастамасы қыруар жұмыс тындыруда. Тіршілік болған соң айтып келмейтін апаттың орын алатыны да бар. Міне, осындай сәтте қиындық құрсауында қалған адамдар ізгі қоғамның ізетті ісімен көңіл жадыратса, демеу көрсе, жан жарасы жазыла түсер еді.
Шортандыдағы жарылыстан соң қапияда қайғы шеккен азаматқа қаржылай көмек берушілер өте көп болды. Бұл жай біздің қоғамның жанашырлығын, бауырмалдығын көрсетеді.
– Өңірде жиырмаға жуық отбасы осы бастама аясында қолға алынған жұмыстың нәтижесінде баспаналы болды, – дейді облыстың бас имамы Қуаныш қажы Жұмабайұлы, – біз Шортандыдағы шетін оқиға туралы естіген кезде қатты уайымдадық. «Тас түскен жеріне ауыр» демекші, ойламаған жерден орын алған оқыс оқиғаның соншалықты зілмауыр екендігін жан жүрегімізбен сезіндік. Іле қаражат жинап, көмектесу туралы бастама көтердік. Халыққа рахмет, аз уақыттың ішінде 14 млн-нан астам ақша жиналды. Көмек қолын созғандар арасында ел ақсақалдары мен жастар да бар.
Игі шараның тағы бір тиімді тұсы – өскелең ұрпаққа өміршең өнеге болатындығында. Ілкі заманнан бері бір-біріне қолұшын беруді парыз санаған парасатты қауымның осындай ордалы ісінен үлгі алып өссе, бірліктің тамыры бекем бола түсетіні тағы бар.
Ақмола облысы
