Жауапсыздық танытқандар жауапкершілікке тартылды
Нұр-Сұлтан қаласының коменданты Ержан Сәденов қала тұрғындарын төтенше жағдай режімі аясында қабылданған шараларды бұзбауға шақырды. Коменданттың айтуынша, елордада жағдай тұрақты. Бір тәулік ішінде қалада 8 қылмыс жасалды, 83 жол-көлік оқиғасы тіркелді, салдарынан екі адам зардап шекті.
Сондай-ақ 464 әкімшілік құқық бұзушылық анықталды, оның ішінде 183-і – тиісті ережелерді бұзу, 36-сы – қоғамдық орындарда спирттік ішімдіктер ішу және 18-і – халықтың көші-қоны саласындағы бұзушылық фактілері. Естеріңізге сала кетейік, қала периметрі бойынша тәулік бойы 6 блок-бекет жұмыс істейді. Төтенше жағдай режімі енгізілгеннен бері 200-ден аса адам ұсталды. Оның ішінде 28 адам әкімшілік қамауға алынды. Төтенше жағдай кезінде жалған хабарламалар пайда болды, олар тоқтатылды. Тұрғындардан тек ресми ақпарат көздеріне сену сұралады. Жалған ақпарат таратудың 3 фактісі анықталды. Барлық факті бойынша қылмыстық істер қозғалды.
«Жалған ақпарат таратуға жол берілмейтіні туралы ескертемін. ТЖ жағдайында ҚР ҚК 274-бабына сәйкес 7 жылға дейін бас бостандығынан айыру көзделген. Тағы да еске саламын, төтенше жағдай кезінде құқыққа қарсы іс-әрекет жасау жағдайды ауырлататын мән-жай болып саналады және неғұрлым қатаң жауапкершілікке әкеп соғады. Құрметті тұрғындар, коменданттық сағатты бұзбаңыз, заңға бағыныңыз және тыныштықты сақтаңыз», делінген елорда комендантының үндеуінде.
51 адам әкімшілік қамауға алынды
Қарағанды облысындағы қоғамдық-саяси жағдай тұрақты. Аймақ коменданты Ерлан Файзуллиннің ақпараты бойынша өткен тәулікте тәртіп сақшылары 13 қылмыстық құқық бұзушылықты ашты.
ТЖ режімін бұзғаны үшін барлығы 586 әкімшілік хаттама толтырылды. 51 адам әкімшілік қамауға алынды. 14 бұзушыға айыппұл салынды, тағы 460 адам ескерту алды. Полиция қызметкерлері тыйым салынған 36 затты тәркіледі. Балқаш блок-бекетінен 53 жастағы қала тұрғыны басқарған Land Cruiser автокөлігінен тегіс ұңғылы қаруға 6 патрон табылды. Иесіне қатысты азаматтық қаруға патрондарды тасымалдау тәртібін бұзғаны үшін хаттама толтырылды. Сондай-ақ ТЖ кезінде полиция қызметкерлері 16 бірлік тегіс ұңғылы қару, 6 пышақ тәркілеп, есірткі заттарын сақтаудың 8 фактісін анықтады. Қарағанды облысының полиция департаменті тұрғындарды төтенше жағдай режімін бұзбауға шақырады және полицейлердің жұмысына түсіністікпен қарайтын және оларға жәрдем көрсететін азаматтарға алғыс білдіреді.
Шетел азаматтары да шектен шығуда
Павлодар облысында бүлік шығарған 900-ге жуық адам жазаланды. Облыс комендатурасы өкілдерінің хабарлауынша, тәртіп бұзғандардың әрқайсысына қатысты әкімшілік іс қозғалған. Жауапқа тартылғандардың қатарында 4 шетел азаматы болған. Материалдардың барлығы сотқа жіберіліп, шешімдер қабылданды. Нақтырақ айтқанда, 220 азамат 15 тәулікке қамауға алынды. Тағы 300-ге жуық бұзақыға 30 АЕК көлемінде айыппұл салынды. Ал өзге ел азаматтары кері қайтарылды. Қазіргі уақытта облыстың күштік құрылымдары күшейтілген жұмыс кестесіне көшкен. Стратегиялық маңызы бар нысандар ерекше бақылауға алынды. Блок-бекеттердегі қызмет күшейтілді. Тәулік ішінде блок-бекеттер арқылы 6 мыңнан аса автокөлік өткен. Жүріп-тұруға рұқсат болмағандықтан, 39 автокөлік мен 88 азаматқа кіру мен шығуға рұқсат етілмеді.
«Коменданттық сағат енгізілсе де, заңбұзушылықтар баршылық. Мәселен, уақыт режімін сақтамаған 700-ге жуық адам ұсталды. Әр адамға қатысты әкімшілік іс қозғалды. Материалдар сотқа жолданды. Сонымен қатар 290 көлік тоқтатылып, айып тұрағына қойылды», деді облыстық полиция департаментінің ресми өкілі Жанна Белялова.
Жалған ақпарат таратқандар да анықталады
Атырау облысында коменданттық сағат талабы 121 мәрте бұзылған. Бұл туралы Атырау облысының коменданты – облыстық полиция департаментінің бастығы Қамза Үмбетқалиев мәлім етті.
«Атырау облысында төтенше жағдай жарияланғаннан бері коменданттық сағат талаптарын бұзған 121 дерек тіркеліп, әкімшілік іс қозғалды. Төтенше жағдай кезінде атқарылатын қызметтің басты мақсаты – қоғам тіршілігінің қалыпты жағдайын орнату. Сондықтан осы бағытта қызмет атқарып жүрген тәртіп сақшылары мен өзге де жауапты мамандардың жұмысына түсіністікпен қарауға, терроризмге қарсы операциялар кезіндегі шектеулерге сабырлық танытып, сақтық шараларын сақтауға шақырамын. Арандатушылыққа жол бермей, күдікті фактілер туралы міндетті түрде полицияға хабар беруді сұраймын. Сондай-ақ жалған ақпараттар таратпаған жөн. Мұндай әрекет үшін Қылмыстық кодекстің 274-бабына сәйкес 3 жылдан 7 жылға дейін қылмыстық жауапкершілік қарастырылған», деді Атырау облысының коменданты Қ.Үмбетқалиев.
Ереже бұзғандардың ешқайсына аяушылық жоқ
Алдыңғы түні Ақтөбе облысында коменданттық сағат тәртібін бұзған 169 адам полиция бөлімдеріне жеткізілді. Оның 149-ы әкімшілік жауапқа тартылды. Ақтөбе облысы аумағында құқық қорғау органдарының қызметкерлері қоғамдық тәртіпті және азаматтардың қауіпсіздігін қамтамасыз етіп отыр. Облыстағы жағдай полицияның толық бақылауына алынды.
«Өткен түні коменданттық сағатты бұзғаны үшін полиция бөлімдеріне 169 азамат жеткізілді, оның 149-ы әкімшілік жауапқа тартылды. Сонымен қатар қазіргі уақытта 3 адам қамауға алынып, 4 адамға қатысты бұлтартпау шарасы қарастырылып жатыр. Сотқа дейін тергеу жалғасады», деп хабарлады облыстық ПД баспасөз қызметінің жетекшісі Ерболат Сарқұлов.
Ақтөбе облысында 10 блок-бекет бар. Оның үшеуі Ақтөбе қаласында орналасқан. Блок-бекеттерде полиция қызметкерлері мен әскерилер қызмет атқарып тұр. Олар облыс және аудан орталықтарынан кіру-шығу кезінде автокөліктердің салонын, жүргізушілер мен жолаушылардың төлқұжатын тексеріп жатыр. Ақтөбе облысының комендатурасы коменданттық сағаттың уақытын кеше сағат 23.00-ден 07.00-ге дейін өзгертті.
15 адам жауапқа тартылды
Шығыс Қазақстан облыстық Полиция департаментінің баспасөз қызметі ұсынған соңғы мәліметтерге сүйенсек, облыс бойынша жағдай тұрақты.
«Қазіргі уақытта өңірдегі жағдай құқық қорғау органдарының бақылауында. Полицейлер күшейтілген режімде өз қызметін жалғастырып жатыр. Төтенше жағдай мен лаңкестікке қарсы операцияны өткізуге байланысты енгізілген шектеулер сақталады», делінген ақпаратта.
Бүгінде аймақ бойынша ұсталғандар саны 1 100-ден асады. Оның ішінде 79-ы қамауға алынған. Коменданттық сағат талабын бұзғаны үшін 15 адам әкімшілік жауапқа тартылды.
Төтенше жағдай режімін 333 рет бұзған
Ақмола облысының соттары 2022 жылғы 6-11 қаңтар аралығында 333 әкімшілік құқық бұзушылық туралы істі қарады. Облыстық Полиция департаменті басқармасы баспасөз қызметінің мәліметінше, алдыңғы тәулікте облыстың 8 тұрғыны Әкімшілік құқықбұзушылық кодексінің 476-бабы бойынша әкімшілік жауапқа тартылды.
«Облыс бойынша 13 блок-бекет жұмыс істейді, оның 8-і – Көкшетау қаласында, 3-еуі – Степногорда және 2-еуі – Бурабай ауданында. Қаңтардың 8-інде Бурабай аудандық полиция бөліміне Түркістан облысының 8 тұрғыны жеткізілді. Олар бір күн бұрын астанадан Бурабай кентіне келіп, курорттық аймақ аумағында мемлекеттік тіркеу нөмірі жоқ көлікпен жүрген. Жол қозғалысы ережелерін бұзғаны үшін көлік құралдарының жүргізушілері Әкімшілік құқық бұзушылық кодексінің 591-бабының 1-бөлігі және 230-бабының 2-бөлігі бойынша әкімшілік жауапқа тартылды», деді ведомство өкілдері.
Сонымен қатар Нұр-Сұлтан қаласына кіреберістегі блок-бекетте Аршалы ауданы Жібек жолының тұрғынынан 75 оқ-дәрісі бар «Сайгак-410» тіркелмеген мылтық тәркіленді. Дәл осы күні Көкшетаудан елорда бағытына шығаберістегі блок-бекетте Щучье қаласы тұрғынының автокөлігінен «ТОЗ 87-01» маркалы тегіс ұңғылы мылтық табылды.
«Облыс аумағында сағат 23.00-ден 07.00-ге дейін коменданттық сағат енгізілді. Өңірдің 180-нен аса белсенді тұрғыны қоғамдық тәртіпті қамтамасыз ету бойынша ерікті жасақтарға қосылды, олардың 84-і – танымал спортшы. Облыс тұрғындарын құлағдар ету үшін «жедел желі» ашылды. Облыс тұрғындары 1303 нөміріне хабарласып, қажетті ақпаратты алуына болады. Бүгінгі таңда Сall-орталыққа коменданттық патрульдеуге қатысу, алкоголь өнімдерін сатуға тыйым салу, көңіл көтеру орындарының жұмыс істеуі мәселелері бойынша блок-бекеттердің жұмысына қатысты 320 қоңырау келіп түсті. Қазіргі таңда облыс аумағындағы жағдай тұрақты», деп толықтырды ведомствоның баспасөз қызметі.
