Ел шетіне індет жеткен 2020 жылы 7 247 адам дертке душар болса, 2021 жылы бұл көрсеткіш 6 есеге өсіп, 42 434-ке дейін жеткен. Ал жыл басынан бері 353 адам індетті жұқтырып үлгеріпті. Індеттің етек алу себептерін әлденеше рет жаздық. Өңірде той-томалақ, ас тыйылмады. Халықтың еті үйреніп кеткен болуы керек, сақтық шаралары да сақтала бермейді.
– Пандемиялық ахуал тұрақты. «Жасыл аймақтамыз». Үміт артқан вакциналау өз нәтижесін беруде. Жаппай екпе егудің нәтижесінде COVID-19 індетін жұқтырғандар саны 5 есеге азайды. Мәселен, өткен жылдың тамыз айында 8 334 адам дертке шалдығып, науқастардың 1 425-і стационарларға жатқызылса, желтоқсан айында індетті жұқтырған 1 622 тұрғынның 200-і ауруханадан ем алды, – дейді облыстық денсаулық сақтау басқармасының басшысы Нариман Сыздықов.
Бүгінгі таңда жансақтау бөлімінде жатқандардың саны кеміді. Бұл ретте індет жұқтырушылардың қатары азаюмен бірге ауруханалардағы төсектік орындардың да қысқарғанын айта кету керек. Нақты деректерге жүгінсек, өңірдегі ауруханаларда 1 мыңнан астам төсектік орын қысқартылды. Жансақтау бөлімінде де 56 орын азайтылған. Дегенмен індет ушығып кетсе, қосымша 3 мың төсектік орын дайын. Өткен жылдың ақпан айынан бастап 300 мыңнан астам ақмолалық екпе салдырса, 25 399 адам үшінші мәрте екпе алған. Ал Pfizer вакцинасының екі компонентін де 2 143 адам алып үлгерген. Облыстық денсаулық сақтау басқармасының мәлі-
метіне қарағанда, өткен жылы жалпы құны 6,2 млрд теңге көлеміндегі дәрі-дәрмек жеткізілген. Оның 99,9 пайызы пайдаланылған.
– Елде жарияланған төтенше жағдай кезінде тегін босатылатын дәрі-дәрмектерді өңірге жеткізуге ешқандай кедергі болып отырған жоқ. Науқастардың басым бөлігі тегін дәрілермен қамтамасыз етілуде. Қорда да тегін дәрі-дәрмектің көлемі жеткілікті, – деді Н.Сыздықов.
Бұдан басқа, құқық қорғау органдарының мәліметтеріне сүйенсек, өткен жылы дәрі-дәрмектерді жеткізу, тиісті деңгейден бағасын асырмау бағытында тексеріс жұмыстары жүргізілген. Тексеріс барысында облыс орталығында бағаны белгіленген шектен негізсіз өсірген бір дәріхана анықталып, 1 856 815 теңге көлемінде әкімшілік айыппұл салынды. Фармацевтикалық нарыққа бақылау жүргізу жұмысы әлі де жалғаса береді.
Ақмола облысы
