Аймақтар • 14 Қаңтар, 2022

Теміржолшылар қан тапсырды

371 рет
көрсетілді
3 мин
оқу үшін

Облыс әкімі Махамбет Досмұхамбетовтің айтуынша, Президенттің тапсырмасына сәйкес, экономикалық әрі стратегиялық маңызы бар ірі өнеркәсіп орындарына әскери күзет қойылған. Оның қатарында Х.Доспанова атындағы халықаралық әуежай мен темір жол вокзалы, Жылыой ауданында орналасқан «Теңіз» кен орны мен өзге де нысандар бар.

Теміржолшылар қан тапсырды

«Теңізшевройл» ЖШС игеріп жатқан бұл кен орнының әлемде баламасы жоқ. Қазір кен орнын­да екі жобаны іске асыру аяқталуға таялды. Оның бірі – келешек кеңею, екіншісі – ұңғы ернеуіндегі қысымды басқару жобасы. Бұл жобалар іске қосыл­ғанда «Теңізден» алынатын «қара алтын» көлемі 12 млн тоннаға артып, жылына 39 млн тоннаға жетеді.

«Мемлекет басшысы Қасым-Жомарт Тоқаевтың тапсырмасына сәйкес, Атырау өңіріндегі экономикалық әрі стратегиялық маңызды ірі өнеркәсіп орындарына әскери күзет қойылды. Оның ішінде «Теңіз» кен орны да бар. Бұл кеніштегі өндіріс орындарын Қазақстанның Қа­рулы күштерінің әскерилері мен облыстық полиция депар­таментінің қызметкерлері «Теңіз­шевройл» компаниясының күзет қызметі өкілдерімен бірлесе күзетіп тұр. Олардың арасында Ұжымдық қауіпсіздік туралы шарт ұйымының (ҰҚШҰ) әскерлері жоқ» деп хабарлады облыс әкімінің баспасөз қызметі.

Мұнайлы шаһарға төрт ба­ғыттан кіретін автокөлік жолына қойылған блок-бекеттерде жүргізушілер мен жолаушылар, көліктің жүк салғышы жіті тексеріліп жатыр. Төтенше жағдай енгізілгеннен бері ко­мен­данттық сағат талабы 78 рет бұзылғаны белгілі болды. Мә­селен, 9 қаңтарға қараған түні Атырау қаласында түнгі мез­гілде жұмыс істеп тұрған үш азық-түлік дүкенінің жұмысы тоқтатылды.

Облыстық аурухананың бас дәрігері Ербол Иманғалиевтің мәліметіне сүйенсек, жаппай тәртіпсіздіктен кейін дәрігер­лерге түрлі жарақат алған 62 адам жүгінген. Қазір 7 адам ауру­ханада жатыр. Оның ішінде 5 науқастың жағдайы тұрақты, ал құқық қорғау органында жұмыс істейтін 2 қызметкердің халі орташа ауыр деп бағаланып отыр.

Ал Атырау магистралдық желі бөлімшесінің директоры Елубай Сапаровтың мәлі­метіне сүйенсек, жергілікті теміржолшылар қан қорын молайтуды ұйғарды. «Елімізде болған жаппай тәртіпсіздіктен құқық қорғау органдары мен әскерилердің қаза тапқаны жа­нымызға батып отыр. Зар­дап шек­кендер де аз емес. Өңір­дегі темір жол саласында жұмыс істей­тін 2 мыңға жуық темір­жол­шы жарақат алғандарды қол­дау үшін қан тапсыруға ұй­ға­рым жасады. Алдымен 70-ке жуық теміржолшы жаппай тәртіпсіздіктен зардап шеккендер үшін  қан тапсырды», деп мәлім етті ол.

 

Атырау облысы