Қазақстан • 17 Қаңтар, 2022

Азаматтық авиация: Өткен жылы не өзгерді?

64 рет көрсетілді

Пандемияның зардабын тартқан саланың бірі – азаматтық авиация. Ұшу-қону үлкен проблемаға айналғанын ескерсек, қазір саладағы әрбір өзгеріске жұртшылық елең ете қалатын болды. Пандемия салдарынан әлі толық айыға қоймаған азаматтық авиацияда көңіл көншітерлік көрсеткіштер барын да ұмытпаған абзал.

Мәселен, өткен жылдың бас­ты жетістіктерінің бірі ретінде Халықаралық азаматтық авиа­­ция ұйымының (ICAO) Қазақ­стан­да жүргізген тексерісін атауға болады. Тексеру қорытындысы бойынша халықаралық ұйым Қазақстанның ұшу қауіпсіз­дігін қамтамасыз ету деңгейін 84 пайызға дейін көтерді. Бұл әлемдік орташа көрсеткіштен 15 пайызға жоғары. Аталған көрсеткіш бойынша, Қазақстан Нидерланд (87 пайыз), Бельгия (87 пайыз), Португалия (87 па­йыз), Чехия (87 пайыз), Латвия (86 пайыз), Дания (85 пайыз), Исландия (84 пайыз), Польша (84 пайыз), Словения (82 пайыз), Кипр (82 пайыз) секілді елдермен бір қатарда тұр.

Индустрия және инфрақұ­ры­лымдық даму министрлігі хабар­лағандай, Қазақстанның азамат­тық авиация саласын тексеру мақсатында Еуропалық комис­сияның Еуропалық Одақ ел­дерінің авиациялық қауіпсіз­дік жөніндегі агенттігі мен авиация­лық билік өкілдері, АҚШ Көлік қауіпсіздігі әкімшілігі (TSA) сарапшылары біздің елге арнайы келді. АҚШ-тың авиациялық сарапшылары министрліктің, авиациялық реттеушінің және әуе­жайлардың үйлесімді жұмы­сын бағалап, аудиторлар алдын­дағы ашықтығын атап өтті.

Бұл ретте «Қазақстанның авиация­лық әкімшілігі» акцио­нер­лік қоғамы бақылау-қадаға­лау функцияларын іске асыру шеңберінде 16 әуежай­ды сертификаттау және 32 инспек­ция­­лық тексеру жүргізген. Авиа­­ция мамандарына куәлік беру бойынша 2 500-ден астам мем­лекеттік қызмет көрсе­тіл­­ген. 9 авиациялық оқу орта­лығы сер­ти­фикаттаудан өтіп, 17 инс­пек­циялық тексеру жүр­гізіл­ді. Биыл Qazaq Air әуе компа­ния­сы­ның әуе кемесі Аруба тізілімі­нен Қазақстанның азаматтық әуе ке­мелері тізіліміне қайта тіркелді.

Сондай-ақ былтыр Қазақстан Азаматтық авиацияның еуро­палық конференциясына бақы­лаушы мәртебесіне ие болды және ТМД-дан ЕСАС-қа қа­былданған үшінші ел атанды.

«Ішкі тасымалдар көлемі пандемияға дейінгі деңгейде қалпына келтіріліп, одан да асып түсті. Ішкі туризмді дамыту шеңберінде Түркістан, Алакөл, Балқаш, Щучье-Бурабай курорттық аймағы сияқты туристік орындарға әлеуметтік маңызы бар рейстер орындалды. 24 елмен 73 бағыт бойынша халықаралық әуе рейстері жаңартылып, ашылды. Бұл пандемияға дейінгі кезеңнің 66 пайызына тең. Мальдив аралдарымен Алматы – Мале, Қатармен Алматы – Доха, Шри-Ланкамен Алматы – Коломбо, Кувейтпен Алматы – Эль-Кувейт, БАӘ-мен Абу-Даби – Алматы бағыттары бойынша жаңа рейстер ашылды», деп хабарлады Индустрия және инфрақұрылымдық даму министрлігінің Азаматтық авиа­ция комитеті.

Сонымен қатар Қазақстан мен АҚШ арасында тікелей тұрақты әуе қатынасын орнату шеңберінде Парламент Мәжілісі ел Үкіметі мен АҚШ Үкіметі арасындағы әуе қатынасы туралы келісімді ратификациялау туралы заң жобасын мақұлдады. Ол тікелей тұрақты рейстерді орындауға құқықтық база қалып­тастырады.

Бұдан бөлек әуе көлігінің жерүсті инфрақұрылымын жаң­ғыртуға да көңіл бөлінуде. Инфрақұрылымды дамытудың 2020-2025 жылдарға арналған «Нұрлы жол» мемлекеттік бағ­дар­ламасы шеңберінде Өскемен қаласы әуежайының ұшу-қону жолағы қайта жаңартылуда. Жолақтарды 300 метрге ұзарту және әуе кемелерінің қазіргі заманғы түрлерін қабылдау үшін жарық-сигналдық жабдықты ауыс­тыру көзделген.

Жеке инвестициялар есебі­нен Шымкент қаласының әуе­жайында жаңа терминалдың құры­лысы жалғасуда. Ол терминал алаңын 3,8 мыңнан 35 мың шаршы метрге дейін кеңей­туге және өткізу қабілетін саға­тына 150 адамнан 2 мың жолау­шыға дейін ұлғайтуға мүм­кіндік береді. Жаңа терми­нал халық­аралық сапа және қауіп­сіздік стандарттарына сәйкес келеді.

Батыс Қазақстан облысының әкімдігі жеке инвестициялар­ды тарта отырып, Орал қаласы әуежайының аэровокзал кеше­нін жаңғырту бойынша жұмыс жүргізуде. Терминал аумағы екі есе ұлғайып, өткізу қабілеті сағатына 100 адамнан 200 жолаушыға жетеді.

Сондай-ақ былтыр Қостанай қаласы әуежайының аэровокзал кешенін реконструкциялау жұмыстары басталды. Өткізу қабілетін сағатына 200 адамнан 250 жолаушыға дейін арттыру жоспарлануда.

Алакөл туристік орталығы­ның көліктер үшін қолжетім­ділі­гін қамтамасыз ету мақсатында Үржар ауылы аэровокзалының ұшу-қону жолағын және ғима­ратын реконструкциялау бойынша жұмыстар жүргізілуде. Сон­дай-ақ Үшарал қаласы әуежа­йы­ның ұшу-қонау жолағын, рульдеу жолын және перронын жаңғырту жұмыстары басталды.

2021 жылы ішкі рейстерде жеке куәліктің түпнұсқасын пайдаланбай, жеке деректерді растау үшін Egov Mobile арқылы цифрлы құжаттар қызметі ен­гізілді. Жоба еліміздің барлық әуежайында іске қосылды.

Соңғы жаңалықтар

Ұқсас жаңалықтар