Жаңа жылдың 13 күнінде өңірде 537 адамға COVID-19 диагнозы қойылған. Ал жалпы эпидемия басталғалы облыста 40 607 адам COVID-19 жұқтырып, 15 282 адам инфекциялық стационарларда ем алған. 857 адам осы дерттен көз жұмды.
«Батыс Қазақстан облысында 13 қаңтар күні ғана 186 адамның ауырғаны тіркелді. Жаңа жылдан бері облыста 18 оқушы, 14 мұғалім, 3 балабақша қызметкері, 4 студент осындай диагнозбен тіркелді», деді облыстық денсаулық сақтау басқармасы Медициналық көмекті ұйымдастыру бөлімінің басшысы Айгүл Құлбарақова.
Науқастардың көбі, яғни 360-ы Орал қаласында тұрады. Бәйтерек ауданында – 64, Бөрлі ауданында – 59, Теректі ауданында – 17, Жаңақала ауданында 14 жағдай тіркелген.
Соңғы аптада өткен аптамен салыстырғанда аурушаңдық деңгейі 85,9%-ға (65-тен 464-ке) өскен.
«Коронавирус инфекциясы облыста да, елімізде де өршіп, ахуал нашарлап барады. Сондай-ақ жаңа «Омикрон» штамын жұқтыру қаупі бар. Жаңа штамның ерекшелігі сол, жұқтыру қаупі жоғары әрі вирусты қайта жұқтыру ықтималдылығы да өте үлкен. Вирус бірінші түсетін жоғары тыныс жолдарында «Омикрон» «Дельта» штамына қарағанда 70 есе тез көбейеді», дейді облыстық санитариялық-эпидемиологиялық бақылау департаменті басшысының орынбасары Нұрлыбек Мұстаев.
Мамандардың айтуынша, әзірге науқастарды емдейтін стационардан да, медикаменттен де тапшылық жоқ. Ауруханаларда арнайы дайындалған төсектің 78 пайызы бос тұр.
2021 жылдың 1 ақпанында вакциналау жұмысы басталғалы өңірде екпенің бірінші компонентімен – 258 101 (39%) адам, екінші компонентімен – 244 900 адам (37%) егілген. Сондай-ақ облыста 22 902 адам (9,3%) ревакциналаудан өткен. Екпе алғысы келетін тұрғындарға бірнеше таңдау бар. Соның ішінде «Спутник Lite» вакцинасына қатысты партияның бір бөлігі Қазақстанға келіп жеткен. Жақын күндері облысқа да жеткізіліп, тиісті қаулы шыққан соң қолданылады.
Ведомствоаралық комиссияның шешіміне орай, эпидемиялық ахуал жақсарғанға дейін облыс аумағында қоғамдық орындарда, көшеде және отбасында да барлық көпшілік шараларды өткізуге тыйым салынды. Бұл жерде марқұмды соңғы сапарға шығарып салу үшін ғана 30 адамға дейін жиналуға рұқсат беріледі. Ал театр, филармония, цирк, концерт залдарында көпшілік шаралар уақытша тоқтайды, діни құлшылықтар өтпейді. Түнгі клубтар, караоке барлар тоқтайды. Жеке кездесулерде 10 адамнан артық жиналуға болмайды және бұл адамдар екпе алған болуы тиіс. Қоғамдық тамақтану орындарында бір үстелде 4 адамнан артық отыруға тыйым салынады. Ashyq жобасына қатысатын кинотеатрлар залдың 30 пайызына ғана билет сатады. Коммуналдық шаруашылық кәсіпорындарынан бөлек мемлекеттік мекемелер 70 пайызға дейін қызметкерлерін қашықтан жұмыс режіміне ауыстыруы тиіс.
Жақын күндері орта білім саласында қысқы каникул аяқталмақ. Н.Мұстаевтың айтуынша, «қызыл аймақ» мәртебесі кезінде өңірдегі оқушы саны 600-ге жетпейтін ауыл мектептерінде оқу үрдісі әдеттегідей жүреді. Ал шәкірт саны 600-ден асатын ірі мектептер онлайн оқу форматына көшеді. Колледждер мен жоғары оқу орындары студенттері жағдайға қарай аралас форматта білім алады.
Батыс Қазақстан облысы
