Қазақстан • 18 Қаңтар, 2022

Ауыл шаруашылығы өнімдеріне экспорттық шектеулер енгізіледі

293 рет
көрсетілді
1 мин
оқу үшін

ҚР Премьер-Министрі Әлихан Смайылов бәсекелестікті қорғау және дамыту агенттігіне монополияға қарсы ден қою және делдалдық схемаларды тергеу шаралары бойынша жұмысты күшейтуді тапсырды, деп хабарлайды Egemen.kz.

Ауыл шаруашылығы өнімдеріне экспорттық шектеулер енгізіледі

«Бәсекелестікті қорғау және дамыту агенттігі монополияға қарсы ден қою және делдалдық схемаларды тергеу шаралары бойынша жұмысты күшейтуі қажет. Біз жосықсыз сатушылар мен делдалдарға ақталмаған және жоғары үстеме бағаның есебінен пайда табуға жол бермеуіміз керек», деді Әлихан Смайылов.

Министрлер кабинетінің басшысы өңірлер әкімдіктеріне сауда үстемелері мен шекті бағаларды бақылау бойынша жұмысты жандандыруды тапсырды.

«Қаржы министрлігі Сауда және интеграция министрлігімен бірлесіп, импорт немесе өндіріс сатысынан нақты тауарларды бөлшек саудада өткізуге дейін электрондық шот-фактураларды міндетті түрде жазып беру жөніндегі пилоттық жобаны жүргізу мәселелерін пысықтасын. Бұл қайта сатудың әрбір деңгейінде үстеме баға мониторингін жүргізуге мүмкіндік береді. Мәліметтерді беру үшін Сауда министрлігі мен Қаржы министрлігінің Мемлекеттік кірістер комитетінің ақпараттық жүйелерін интеграциялау мәселелерін шешу қажет», деп толықтырды Әлихан Смайылов.

Ол Ауыл шаруашылығы министрлігіне ауыл шаруашылығы өнімдерін өндіру мен тұтыну көлемін есептеп, қажет болған жағдайда экспорттық шектеулер енгізуді тапсырды.

«Бірінші кезекте біз ішкі нарықты молайтуды қамтамасыз етуіміз керек», деп түйіндеді Әлихан Смайылов.