– Мұндай шараны біз алғаш былтыр көктемде өткізіп көргенбіз. Бірақ ол жолы әдеби марафонға жасөспірімдер ғана қатысты. Балалар Пауло Коэльоның, Джэром Сэлинджердің, Мариам Петросянның шығармаларын оқыды. Былтыр шараға қатысушылар саны көп болмады. Өйткені біз тікелей эфир арқылы әлеуметтік желілерге шығып, марафонды онлайн түрінде де өткіздік. Биылғы оқырмандар марафонына кез келген жастағы тұрғындар қатыса алады. Бұл жолы сәл өзгешелеу түрде өткізгіміз келеді. Егер эпидемиялық ахуал мүмкіндік берсе, шараның соңын ауқымды пікір алысу жиынымен қорытындыламақ ойдамыз. Жиында айтылған ой-пікірлердің бәрі кітапхананың сайтында жарияланатын болады, – дейді кітапхана қызметкері Татьяна Тихомирова.
Оқуға ұсынылатын көркем шығармалар романтизмнен бастап постмодернизмге дейінгі әр алуан әдеби дәуірлерді қамтиды. Тақырып тұрғысынан да, жанры жағынан да әр алуан. Мәселен, биылғы марафонда оқылатын кітаптардың ішінде Эрнест Хэмингуэйдің «Шал мен теңізі», Франц Кафканың «Процесс» романы, Михаил Булгаковтың «Жас дәрігердің жазбалары», Виктор Пелевиннің «Омон Ра» романы, Сергей Довлатовтың «Чемодан» әңгімелер жинағы бар. Оқырмандар кітапханаға келіп, аталған кітаптардың ішінен біреуін таңдап алған соң, шығарманы бір айдың ішінде оқып шығуы тиіс.
Кітапхана ұжымы аталған шараларды жиі ұйымдастыру арқылы көпшіліктің көркем әдебиетке деген қызығушылығын оятып, кітапхана қабырғасында оқырмандар клубын жандандырғысы келеді. Марафон бір айға созылады. Татьяна Тихомированың айтуынша, қазірдің өзінде кітапханадан оқырмандар марафонына қатысамын деп келген отыз шақты адам кітап алып кеткен.
Қостанай облысы
