Қызмет түрлерінің тізбесін кеңейтті

Былтыр «Ақтау теңіз порты» арнайы аймағының қызмет түрлері кеңейтілді. Енді аталған АЭА жылу электр стансаларымен электр энергия­сын өндіру; электр энергиясын беру және тарату; тұрғын және тұрғын емес ғимараттар құрылысы; қонақ үйлер және тұруға арналған орындар қызметтерін ұсыну; жеке немесе жалға алынған жылжымайтын мүлікті жалға алу және басқару; демалыс пен ойын-сауықты ұйымдастыру бойынша қызметтер секілді жобалармен айналыса алады:

Қарқынды дамып келе жатқан аймақ­тардың бірі – «Сарыарқа» АЭА. Онда дайын металл бұйымдары мен құрылыс материалдары: шарлы крандар, жылу оқ­шау­лағыш құбырлар, отқа төзімді материал­дар, жезден жасалған бұйымдар, дірілге және отқа төзімді бұйымдар шыға­рылады. Енді «Сарыарқа» АЭА-да істен шыққан көлік құралдарын, арнайы техника және ауыл шаруашылығы машиналарын, тоңазытқыштар мен тоңазытқыш жабдықтарын жинап, өңдеп және қал­-
дық­­тарды жойып, қалпына келтіре алады.

Qyzyljar АЭА қызмет түрлерінің толықтырылған тізбесіне ағаш мас­сасы мен целлюлоза; қағаз және картон; гоф­ро­картон; қағаз және картон ыдысы; шаруашылық-тұрмыстық және сани­тар­­лық-гигиеналық мақсаттағы қағаз бұйым­дары; фармацевтикалық өнімдер мен препараттар; ветеринарияға ар­налған дәрілік препараттар өндірісі кірді.

Қызметтің басым түрлерінің тіз­бесі TURKISTAN АЭА-да да кеңей­тілді. Нысандарға кешенді қыз­мет көрсету; аумақтарды абаттандыру қыз­мет­тері; жиһаз бен интерьер зат­та­рын жөндеу; тамақпен және сусын­дармен қамтамасыз ету бо­йынша қыз­мет көрсету; электрондық және опти­ка­лық жабдықтарды жөндеу; басқа топтамаларға енгізілмеген ақпараттық технологиялар мен жүйелер саласындағы өзге де қызмет түрлері қосылды.

Бұдан басқа, «Ұлттық индустриялық мұнай-химия технопаркі», «Ақтау теңіз порты», «Сарыарқа», «Тараз химиялық паркі» және «Павлодар» АЭА-да қызмет түрлері «Көп бейінді аурухана құрылысы және пайдалануға беру» тармағымен толықтырылды.

Сонымен қатар былтыр бірнеше АЭА аумағы ұлғайтылды. «Сарыарқа» АЭА ауданы жылу электр стансасын және ферро­қорытпа мен кокс өндіретін зауыттар салу үшін 345,5 га-ға өсті. Qyzyljar АЭА-на қағаз және қағаз өнімдерін өндіре­тін зауыт салу үшін 15 га қосылды. «Астана – жаңа қала» АЭА 83,7 га-ға ұлғайып, оның аумағында темір жол машина жасау кластері құрылды. Кезінде жеңілдіктер құрылыс индустриясына қатысушыларды қызықтырып, қысқа мерзім ішінде көптеген тұрғын үйлер және әлеуметтік объектілер салынды. Елорданың сол жағалауында жаңа әкімшілік-іскерлік және мәдени орталық құрылды.

Айта кетелік, бүгінгі таңда Қа­зақстанда 13 АЭА жұмыс істейді. 2002 жылдан бастап онда 307 жоба іс­ке асырылып, 21 мыңнан астам тұ­рақты жұмыс орны ашылды. АЭА-ның ерекше мәртебесінің нәтижесінде кәсіпорындарда 30-дан астам жаңа өнім түрлері, оның ішінде оптикалық құрылғылар, түнде көру аспаптары, бронетранспортерлер, локомотивтер, жолаушылар вагондары, премиум-клас­ты құбырлар, мақта целлюлозасы, полипропилен жіптер және т.б. шығару жолға қойылды.

АЭА қатысушылары үшін биз­несті мемлекеттік қолдау түрінде бірқатар жеңілдіктер жасалды. Атап айтқанда, резиденттер корпоративтік, жер және мүлік салығын төлемейді. АЭА аумағында сатылатын тауарлар үшін қосымша құн салығының (ҚҚС) мөлшерлемесі 0-ге тең. Жер учаскелеріне барлық қажетті инфра­құрылым тартылады. Учаскелер АЭА режі­мінің барлық кезеңіне тегін бері­леді. Қатысушылар жалдау және жер салығын төлеуден босатылды.