Мәселен, коронавирус инфекциясының таралу қаупін азайту үшін тестілеу пункттерінде түлектер міндетті түрде маска тағуы керек. Термометрия да жүзеге асырылады. Сонымен қатар тест сынағын өткізуге жауапты мамандар барлық пункттердің санитайзерлермен, шектеу ленталарымен, дезинфекциялау кілемшелерімен жабдықталғанын айтады. Әрбір аудиторияда пайдаланылған маскаларға арналған қоқыс жәшіктері, рециркуляторлар және бактерицидті шамдар орнатылған.
Ұлттық тестілеу орталығы Қарағанды филиалының басшысы Динара Баймағамбетова 2021 жылдан бастап ҰБТ «бір компьютер – бір камера – бір тест тапсырушы» қағидаты бойынша электронды форматта өткізіле бастағанын тағы бір мәрте еске салды.
Биыл тестілеу сынағында облыс бойынша 5 мыңға жуық талапкер бақ сынап көрмек. Тіркелу кезінде түлектерге ҰБТ тапсыру күнін, уақытын және орнын өздерінің таңдауына құқық берілген.
Динара Баймағамбетова тестілеу кезінде ҰБТ өткізу пунктінің аумағында ата-аналардың, мұғалімдердің және басқа да адамдардың болуына жол берілмейтінін айтады.
– Аудиторияларға тест тапсырушыларды қашықтықты сақтай отырып, баррикадалық таспалар арқылы кезек-кезекпен өткізеді. Түлектер бір-бірінен кемінде бір метр қашықтықта отырғызылады. Әрбір тестіленушінің органикалық шынымен қоршалған өз орны болады, – дейді ол.
Жалпы, тест сынағында түлектерге 120 сұрақ беріледі. Үміткер әрбір пән бойынша кемінде бес балл жинауы тиіс. Олардың дұрыс жауаптары 140 балл болып есептеледі. Яғни мамандандырылған пәндерде кейбір сұрақтар 0-ден 2 баллға дейін, ал қалған сұрақтар бір баллмен бағаланады.
Білім беру грантын беру жөніндегі конкурсқа қатысу үшін немесе ақылы негізде оқуға қабылдану үшін түлектерге қажетті шекті балдар белгіленген. Мысалы, «Педагогикалық ғылымдар» үшін кемінде 75 балл болуы керек. «Денсаулық сақтау және әлеуметтік қамтамасыз ету (медицина)» саласына тырнақ іліктіруге кемінде 65 балл керек. «Ауыл шаруашылығы және биоресурстар» және «Ветеринария» мамандықтарын таңдағандарға кемінде 60 балл жинағаны жөн. Ал ұлттық жоғары оқу орындарына, сондай-ақ басқа жоғары оқу орындарының студенті аталуы үшін түлектер, сәйкесінше, кемінде 65 балл және 50 балл алуы керек.
Қарағанды облысы
