Жер бетіндегі барлық музей, кітапхана, театр залдары, бәрі-бәрі бұрынғы қамсыз тіршілігінен жаңылып, жабылған есіктер әлі де емін-еркін айқара ашыла алмай тұр. Ол есіктердің ішінде Франциядағы атақты мұражайлардың да қымбат қақпалары бар.
Дәл деректерге сүйенсек, атақты Луврды былтыр небәрі 2,8 миллион адам ғана аралай алыпты. Бұл көрсеткіш, аталған мұражайдың пандемияға дейінгі келушілер санының 30 пайызы ғана екен. Егер дүние бұрынғы қалпында болар болса, Лувр табалдырығын жылына 10 миллион адамға дейін тоздыратын еді. Бұл мұражайдың 1986 жылдан бергі ең төмен көрсеткіші болса керек.
Ресми дереккөздерге сенсек, пандемияның екінші жылында француз мұражайларына келушілердің жалпы саны ковидке дейінгі деңгейден 60-70% төмен болғанын айтады.
Луврды тамашалаушылардың алпыс пайызы жергілікті тұрғындар, жалпылай алғанда француздардың өздері делінеді. АҚШ пен Германиядан келушілер мұражай қонақтарының небәрі 6 пайызын құрайды. Англия халқының 2 пайызы ғана биыл Джоконданы тамашалаған сияқты. Ең өкініштісі, биылдыққа Азиядан бірде-бір адам Луврға ат шалдырмаған. Көңілсіздеу көрсеткіштер солай дейді...
Пандемияға дейін Луврға келуші америкалықтардың үлес салмағы 20 пайыз болса, екінші орында қытайлықтар болған.
Соңғы екі жыл ішінде үкіметтің бұйрығымен француз мұражайлары, жалпы алғанда бір жылға жуық жабылған екен. Осы уақыт ішінде мемлекет оларға қаржылай қолдау көрсетіп отырған.
Жалпы, Луврдың 2021 жылғы табысы 2019 жылмен салыстырғанда 80 миллион еуроға азайды.
