Атыраулық мұнайшылар Наурыз мейрамын алғашқылардың қатарында атап өтті
Батыс аймақта Наурыз мейрамы көрісумен бастау алады. Бұл күні алдымен жасы кішілер үлкендерге сәлемдесіп, бір-біріне «Наурыз мейрамы құтты болсын! Аман-есен жүріңіз!» деп жақсылық тілеген ақжарма көңілдерде өкпе-реніштің бәрі ұмытылады. Көпті көрген данагөй қариялар арқылы ұрпақтан-ұрпаққа жалғасып келе жатқан осынау ұлттық дәстүрді жаңғыртуға ірі кәсіпорындар да бет бұрды. Өткен жұмада, яғни, 14 наурызда қазақ мұнайшыларының қара шаңырағы – «Ембімұнайгаз» акционерлік қоғамы Наурыз мейрамы алдында көрісу шарасын өткізді. Осыған орай Д.Нұрпейісова атындағы мәдениет сарайы алдында қазақы ою-өрнекпен көмкерілген бірнеше киіз үй тігіліп, наурызкөже, тайқазанда дәмі тіл үйірген палау пісірілді. Алтыбақанда ұлттық киім киген қыз-жігіттер тербетіліп, балалар асық ойынын қыздырды. Бұл күні кәсіпорын басшыларынан бастап, осында еңбек ететін әр қызметкер ұлттық киім киіп, бір-біріне құшағын аша көрісіп жатты. Ардагер-мұнайшылар да көңілді, өздерінің өнегелі ісін жалғастырып келе жатқан ізбасарларына ізгі баталарын берді.
– Мен 40 жылдай «Ембімұнайгазда» электрик мамандығымен жұмыс жасадым. Ол кезде мұндай ұлттық мерекемізді атап өтпек түгілі, ауызға алудың өзі қиын кезең еді ғой, –деп өткен кезін еске алады осы кәсіпорыннан зейнеткерлікке шыққан Гүлзина Исемгелдиева. – Бүгінгі бейбіт өмірімізге тәубе деп айтайық, еліміз егемендігін алғалы бері ұлттық құндылықтарымызға ерекше көңіл бөлініп келеді. Бүгін міне, «Ембімұнайгаз» басшылары көрісу шарасын өткізіп отыр. Бұл – біздің халқымызда ежелден бар, кейінгі ұрпаққа өнеге боларлық шара ғой.
Биыл «Ембімұнайгаз» АҚ өткізген көрісу шарасына кәсіпорынға қарасты төрт мұнай-газ өндіру басқармасы мен екі құрылымдық құрылымы қатысты. Ал осы кәсіпорында ұзақ жыл еңбек етіп, зейнеткер атанған ардагер-мұнайшылар шараның құрметті қонағы ретінде шақырылды. Әр басқарма ұжымы қазақтың ұлттық дәстүрінен сахналық қойылымдар көрсетті. Мәселен, «Жылыоймұнайгаз» басқармасының ұжымы алдымен жеңге мен қайын сіңлі арасындағы жарасымды сыйластық қыз бен жігіт айтысына ұласты. Қазақы әзілге құрылған қыз бен жігіт айтысының шынайылығы шараны қызықтаушылардың ыстық ықыласын туғызды. Қыз бен жігіттің әзіл-қалжыңға құрылған айтысы олардың бір-бірімен кеңірек танысуына жол ашты. Мұның артынан «Жайықмұнайгаз» басқармасының мұнайшылары қазақтың әр шаңырағында әлі күнге дейін болып жататын құда түсу көрінісін көрсетті. Былайғы күндері мұнайшы болғанмен, қазақы шапан мен қалпақ киіп, сахнаға шыққанда құдды театрдың әртістерінен еш айнымайды. Құдалар мен үй иелерінің рөлдерін орындауда кәсіби әртістерден кем түскен жоқ.
Тәй-тәй басып жүруге талпынған балбөбегінің қадамы сәтті болсын дейтін игі тілекпен тұсау кесуді ең абыройлы, ең ізгі жүректі адамға ұсынатын қазақтың даналығын сөзбен жеткізу қиын шығар, сірә. Дегенмен, «Ембімұнайгаз» мұнайшылары осы бір ұлттық дәстүрдің кейінгі толқынға өнеге боларлық ерекшелігін кеңінен аша түскені көңілге қуаныш ұялатқанын жасырғымыз келмейді. Қазақтың қай отбасысы бесік той болғанын аңсамайды дейсіз. Есте жоқ ескі заманнан бері бесік той әр қазақтың шаңырағын көл-көсір қуанышқа бөлеген. Үлкен әулет пен оның барша ағайынын мәре-сәре қуанышқа кенелтетін бесік тойдың ерекшелігін атыраулық мұнайшылар да жадына мықтап түйгенін аңғартты. Қазақтың мұнайшылары тек мұнай мен газ өндіріп қана қоймайды. Сонымен бірге, халқымыздың бата беру дәстүрі мен ұлттық ойындарын еркін меңгергені «Доссормұнайгаз» және «Қайнармұнайгаз» басқармалары мұнайшыларының сахналық көріністерінен айқын аңғарылып тұрды.
– Біздің кәсіпорынның межеленген жоспарын орындап, мол табысқа жетуі – ұжымдағы әр қызметкердің қажырлы еңбегінің жемісі, – деді мұнайшыларды Наурыз мейрамымен құттықтаған «Ембімұнайгаз» АҚ бас директоры Махамбет Досмұхамбетов. – Өткен жылы мұнай өндіру жоспарымыз артығымен орындалды. Өндірістік жоспардың мерзімінде орындалуы әлеуметтік мәселелердің оң шешілуі мен еңбек қатынасын жақсартуға оң ықпалын тигізіп отыр. Жаңа кен орындарын пайдалануға беру, мұнай алу үшін қабат қысымын жоғарылату шараларын жүргізу, сонымен қатар, ұңғымаларды күрделі жөндеу жұмыстарын атқару арқылы мұнай өндіру көлемі ұлғайтыла бермек. Елбасы тапсырмасына және «ҚазМұнайГазға» қарасты компаниялар тобының бірыңғай еңбекақы төлеу жүйесіне көшуіне байланысты сәуірден бастап қызметкерлер жалақысына 10 пайыз үстеме қосылғалы отыр.
Айтқандай, «Ембімұнайгаз» басшылығы мұнайшылардың әлеуметтік ахуалын жақсартуға баса мән беріп отыр. Өткен жылдың аяғында 2014-2016 жылдарға арналған жаңа ұжымдық келісімшартқа қол қойылды. Бұл құжатта жұмысшы мен жұмыс берушінің құқықтары мен міндеттері, жеңілдіктер мен әлеуметтік қолдау тетіктері нақтыланған. Қазір 5,5 мың адам жұмысқа тартылып, 97 пайызы кәсіподақ комитетіне мүшелікке алынған кәсіпорынның жаңа ұжымдық келісімшартында жұмысшылардың мүддесі мен денсаулығын қорғау, жұмыс барысында және демалыс кезінде барлық жағдайды туғызу тұрғысындағы әлеуметтік жауапкершілігі нақты көрініс тапқан. Әсіресе, жастарды әлеуметтік қорғау мәселесі де назардан тыс қалмаған.
– Ел тәуелсіздігімен отандық өндірістің еңсесі тіктелді, – дейді 40 жылдан бері еңбек етіп келе жатқан байырғы мұнайшы Тәшкент Айтбаев. – Сондықтан біздің жас мамандарымыз мұнай ісін меңгеруде, алдыңғы толқын мұнайшылардан үйренуде ештеңеден қаймықпайуы қажет. Отандық мұнай-газ өнеркәсібінің өркендеуі де, елдің келешектегі қарқынды дами беруі де жас мамандардың біліктілігіне байланысты болады. Шүкір, еліміз әлемге танылды, экспортқа өнім шығару үлесі молайып келеді. Алдағы кезде де тәуелсіз еліміздің ұлттық құндылықтары жарқырай көрініп, экономикалық өркендеуі бүгінгі қарқынынан таймаса дейміз.
Бұл кәсіпорын шежірелі тарихқа да, еңбек дастанына да бай. Ал «қара алтын» селін тасытуда қажырлы еңбегін сіңірген ардагер-мұнайшылардың шежірелі жолы мен еңбек дастанын озық технологияны меңгерген білікті ізбасарлары жалғастырып келеді. Демек, «Ембімұнайгаздың» шежірелі тарихы да, еңбек дастаны да үзілмейді, үздіксіз қаттала береді.
Жолдасбек ШӨПЕҒҰЛ,
«Егемен Қазақстан».
Атырау облысы.
