Іс-шараға АҚШ-тың оңтүстік және Орталық Азия істері жөніндегі мемлекеттік хатшысының көмекшілері Дональд Лу және Еуропа мен Еуразия істері бойынша Карен Донфрайд, сондай-ақ Әзербайжан, Армения, Грузия, Қырғызстан, Тәжікстан, Түркіменстан және Өзбекстанның жоғары өкілдері қатысты. Кездесудің модераторы АҚШ-тың Қазақстандағы бұрынғы елшісі Ричард Хоугланд болды.
ҚР Президентінің Арнайы өкілі Ержан Қазыхан Каспий өңірі елдерінің АҚШ-пен ынтымақтастығын дамыту үшін елеулі әлеуеті барын атап өтті.
«Біз АҚШ-пен бірқатар негізгі бағыттар бойынша, соның ішінде терроризмге және қауіпсіздіктің басқа да сын-тегеуріндеріне қарсы күрес, транзиттік-көлік жүйесін әртараптандыру, климаттың өзгеруіне қарсы іс-қимыл жасау, әйелдердің экономикалық құқықтары мен мүмкіндіктерін кеңейту бойынша іс жүзінде өзара іс-қимыл жасау үшін тиімді мүмкіндіктерді көріп отырмыз», деді Ержан Қазыхан.
Қазақстандағы қаңтар оқиғалары жөнінде Ержан Қазыхан Мемлекет басшысының елдің саяси, экономикалық және институционалдық жаңғыруын жалғастыруға деген берік ұстанымын ерекше атап өтті.
«Жақын арада жаңа кабинет 2022 жылға арналған іс-қимыл жоспарын ұсынады. Осылайша, жаңа экономикалық саясат жаңа Қазақстанның негізіне айналады», деп түйіндеді ол.
Қазақстанда болған оқиғалар Д. Лу ұсынған баяндамасының да басты назарында болды. Ол ҚР басшылығының одан әрі саяси және экономикалық қайта құрулар бағытын жалғастыруды қамтамасыз ететініне сенім білдірді.
«Батыстың міндеті - Қазақстанды үйрету емес, қолдау және елге қаңтар айында туындаған адам құқықтары мәселесін түсінуге мүмкіндік беру және болашақта мұндай жағдайдың алдын алу үшін қажетті әлеуметтік, саяси және экономикалық реформаларды одан әрі дамыту», деді Д. Лу.
Жалпы, вебинарға қатысушылар саяси, экономикалық және мәдени-гуманитарлық диалогты одан әрі дамыту мақсатында аймақ елдерінің АҚШ-пен ынтымақтастығының маңыздылығын атап өтті.
