«Атырау» әлеуметтік кәсіпкерлік корпорациясы» АҚ мемлекеттік бағдарламаларды іске асыру департаментінің директоры Дмитрий Дюдың мәліметіне сүйенсек, тұрақтандыру қорының қоймасында 216 тонна азық-түлік, 2 379 тонна ауыл шаруашылығы өнімдері бар. Әлеуметтік маңызға ие тауарлардың бағасын тұрақтандыру үшін «Атырау» ӘКК» АҚ төрт сауда желісі мен тауар өндірушілерге айналым қаражатын толықтыру үшін 1 млрд 35 млн теңге көлемінде қарыз беріп отыр. Енді кәсіпкерлер алдында әлеуметтік маңызы бар 19 түрлі азық-түлік тауарының бағасын тұрақтандыру міндеті тұр.
– «Лидер» және «Идеал» супермаркеттерінің 39 сауда нүктесінде азық-түлік 33 пайыздық төмен бағамен сатылып жатыр. Тауарлар күн сайын сауда нүктелеріне жеткізіледі. Азық-түлік өнімдері супермаркеттер желісінде «Тұрақтандыру қорының тауарлары» деген жазуы бар арнайы сөреге орналастырылған. Атырау қаласындағы төрт базарда ауыл шаруашылығы тауарларының бағасы нарықтағыдан 63 пайызға төмен. Мәселен, бірінші сұрыпты ұннан пісірілген нан бағасы – 80-82 теңге. Ал сиырдың жауырын және төссүйегі бар еті – 1 853, 10 дана жұмыртқа – 360, картоп – 185, пияз – 80, сәбіз – 145, қырыққабат – 125, қызылша бағасы 170 теңге тұрады. Көкөністер «Дина», «Сарайшық», «Насиха» және «Көктем» базарларында сатылымға қойылды, – деп мәлімдеді Дмитрий Дю.
Атырау облысы
