Заманауи техниканың тілін білуді мақсат еткен Тимур жақында өз мектебінің жеке сайтын жасауды қолға алған екен. Аз күнде оған қол жеткізіпті. Оқушы мектептің сайтын қазақ, орыс және ағылшын тілдерінде жасап шығарған. Бұл сайтта «Біздің мектеп», «Байланыстар», «Галерея» сияқты бөлімдер бар. Сайттан оқушылар мен ұстаздар мектептің тыныс-тіршілігімен таныса алады.
– Бұл сайттың пайдасына келер болсақ, мектепке жаңадан келетін оқушылар болса, мектеп туралы толық ақпарат алуға мүмкіндік бар. Болашақта онлайн кітапхана құру жоспарда бар. Мектептің сайтына QR код арқылы кіруді ойластырып қойдым. Сонымен қатар сайтқа оқушылар мен ұстаздарға арналған чат құруды бастадым, – дейді жас өнертапқыш.
Айтпақшы, Ж.Сыдықов атындағы орта мектептің 7-сынып оқушысы Тимур Біріжанов былтырғы оқу жылында аудандық «Менің Отаныма – менің бастамам» шығармашылық жобалар байқауына қатысып, оның «Медиа жобалар» бағыты бойынша жүлделі І орын алыпты. Сондай-ақ облыстық «Менің Отаныма – менің бастамам» шығармашылық жобалар байқауының «Медиа жобалар» бағыты бойынша да жүлделі ІІ орын иегері атанған.
– Тимур – біздің мектептегі дарынды оқушының бірі. Ол мектеп сайтын құрастырып жасауда. Сонымен қоса санитарлық авиация саласында қолдану үшін тікұшақ макетін құрастырды. Осы жобасымен былтыр «Ұлы өнертапқыштыққа алғашқы қадам» инновациялық идеялардың облыстық байқауынан «Авиация саласындағы жобалар» аталымы бойынша жүлделі 1-орын иегері атанып, республикалық байқауға жолдама алды. Тимурдың алар асулары, шығар белестері көп екеніне сенеміз, – дейді жас өнертапқыштың жетекшісі, мектептің информатика пәнінің мұғалімі Гүлжан Құлынбаева.
Алматы облысы
