Ал таяуда облыс әкімі Жеңіс Қасымбек кеншілердің бастамашыл тобымен кездесіп, «АрселорМиттал Теміртау» АҚ ұжымдарының келісім комиссиясы қабылдап алған талаптарының орындалуы бойынша кеңес өткізді.
Жиын барысында алпауыт компанияның атқарушы директоры Әлішер Әбенов кеншілердің басты талабының бірі – көлік паркін жаңартудың ойдағыдай іске асқанын баяндады. Нақтырақ айтқанда, бес жаңа автобус алынып, тағы жетеуі жақын арада компания иелігіндегі көліктердің қатарына қосылмақ. Жалпы алғанда кәсіпорын биыл 56 заманауи автобус сатып алуды жоспарлап отыр.
Еске салар болсақ, апаттан кейін кеншілер компания басшылығы алдына барлығы 12 талап қойған болатын. Кәсіпорын басшыларының айтуынша, бүгінде сол талаптардың түгелге жуығы орындалған. Тек, жұмыста персоналдың нормативтік санын, жабдықтың техникалық аудитін ескере отырып, инвестициялық бағдарламаны жаңартуға қатысты бірнеше тармақ қана қалған.
Сонымен қатар кездесуде кеншілер мен металлургтер үшін жеңілдетілген ипотекалық бағдарлама мәселесі де көтерілді. Жалпы, бұл бағдарламаны жүзеге асыру үшін облыстық бюджеттен миллиард теңге бөлінген болатын. Осы орайда, «Отбасы банкінің» Қарағанды облыстық филиалы ипотека алуға тілек білдірушілерді көбірек қамту үшін қосымша қаржыландыруды бастамақшы. Жиында аталған банк филиалының директоры Бауыржан Жуаспай кәсіподақтардың 67 адамнан тұратын алғашқы тізімді бергенін хабарлады.
Аталған жиында өңірдегі моноқалаларды дамыту мәселелері де сөз болды. Соңғы жылдары Қарағанды облысында моноқалаларды дамытуға көп көңіл бөліне бастағаны рас. Дегенмен, атқарылып жатқан жұмыстарға тоқмейілсуге болмайды. Мәселен, Шахтинск, Саран және Абай қалаларында тұрғын үй салу, жолдарды жөндеу және әлеуметтік инфрақұрылымды жақсарту әлі де болса күн тәртібінде өткір тұр.
Тұрғындарының басым бөлігі кеншілер болып келетін Шахтинск қаласында биыл бес қабатты үй салу жоспарланған. Қаладағы Абай атындағы орталық даңғылда жөндеу жүргізіледі, мәдениет және демалыс саябағын абаттандыру жұмыстары аяқталады. Сондай-ақ Шахтинскіде заманауи хоккей корты пайда болады. Мұның бәрін кеңес барысында қала әкімі Әскербек Халтонов мәлім етті.
Сол сияқты Саран қаласы мен Абай ауданында да осы бағытта бірқатар ауқымды жұмыс қолға алынған екен. Мысалы, Саранда тұрғын үй салудан бөлек, газдандыру мәселесінің де оң шешім таба бастағаны белгілі болды. Қала әкімі Ержан Темірханов көгілдір отынды шаһар іргесіндегі Ақтас кентінен бастап берудің жоспарланғанын жеткізді.
Ал Абай ауданының басшысы Бауыржан Асанов болса, «Абай» шахтасының жолын жөндеу жұмыстарының аяқталуға жақын екенін хабарлады. Сондай-ақ кеншілердің шағымынан кейін Вольный кентінде дәріхана ашылатын болды. «Абай-Вольный-Қызыл» бағыты бойынша автобус рейстерінің саны да арта түспек. Аудан әкімі бұл мәселелердің таяу арада оңынан шешілетініне уәде берді.
Жиында «Тентек» шахтасының тау-кен шебері Нұрболат Әбдірахманов өткен жылдың қарашасынан бастап ай сайын облыс әкімімен, компания басшылығымен кездесулер болып келгенін айтты. Соның нәтижесінде көптеген пайдалы шешімдердің қабылданғанын, талай шаруаның тындырылғанын атап өтті.
– Бұл кездесулер өте қажет. Тараптардың, талаптардың орындалу барысын талқылағаны өзінің оң нәтижесін бере бастады. Жалпы, ұжымдарды толғандыратын барлық мәселе көтерілуі керек, – деді ол.
Кеншілердің бастамашыл тобымен кездесуді қорытындылған өңір басшысы барлық мәселе шешімін толық тапқанға дейін жұмыс тобы өзінің міндетін орындауды жалғастыра беретінін мәлімдеді. Сонан кейін кеншілер ұжымдары көтерген мәселелерді шешудің жіті бақылауда екенін атап өтіп, бір айдан кейін дәл осындай форматта тағы кездесу өтетінін хабардар етті.
Қарағанды облысы
