Аталған жарысқа елорда, Алматы және Шымкент қалаларынан, сондай-ақ еліміздің 11 облысынан барлығы 104 тоғызқұмалақшы қатысып, бақ сынады.
Қарағандылық тоғызқұмалақшы қыз жеті күнге созылған додада Әсел Дәлиева, Гүлжанат Алдабергенова, Лина Кәрімова сынды мықты қарсыластарын артқа тастап, турнирдің алтын медаліне иелік етті.
Қазақстанның су жаңа чемпионы Аңсаған Қожанәсіп халықаралық ареналардағы додаларда да тамаша нәтижелер көрсетіп жүрген шебер. Мысалы, ол былтырғы желтоқсан айында өткен Азия чемпионатында блиц бойынша өткен жарыста топ жарған болатын. Ал оның бауыры Асылхан Қожанәсіп болса, сол турнирде рапид сыны бойынша күміс жүлде иегері атанды.
Еске салар болсақ, Азия чемпионатында Ресей, Түркия, Қытай, Моңғолия, Ауғанстан, Түрікменстан, Үндістан, Қазақстан және тағы басқа елдерден 180-нен астам тоғызқұмалақшы күш сынасқан-тұғын.
Жалпы, Қарағанды облысында соңғы жылдары Ұлттық спорт қарқынды түрде дамып келеді. Ал тоғызқұмалаққа келсек, қазіргі уақытта спорттың бұл түрімен 15 мыңға жуық адам айналысып жүр.
Қарағанды облысы
