«Берекелі әйел» жобасы туралы естіген Гүлбану Жасыбаева кәсіпкерлік саласындағы қыр-сырды меңгеріп, дамуға бел байлаған.
Нәтижесінде жоба аясында бизнес-жоспар құруды үйреніп, кәсіпкерлерге бөлінетін шағын гранттардан хабардар болады.
Жастайынан қолөнер бұйымдарын жасауға бейім Гүлбану осы қабілетін кәсіпке айналдырып, ауылдастарымен бірге көрпе жабдықтарын, сүлгі секілді бұйымдарды тігіп кәсібін бастаған.
Азаматтық бастамаларды қолдау орталығы ұсынатын шағын гранттар конкурсында да жеңімпаз атанып, үй жанынан ателье ашып, екі шебер қыз-келіншекті жұмыспен қамтып отқан ол ауылдастарынан кеңесін аямайды.
«Достық ауылы тұрғындарының WhatsApp-та ортақ чаты бар. Мен ауылдастарыма үнемі байқауларға қатысуға, көптеген мемлекеттік гранттарға ие болуға кеңес беремін. Қызығушылық танытқандардың барлығына өтінімді қалай дұрыс толтыру керектігін, неге назар аудару керектігін айтамын. Даму жолдарын іздеу керек, қолды қусырып отырудың жөні жоқ», дейді Гүлбану Жасыбаева.
