Ел ертеңін қаузаған бір сөзінде Мемлекет басшысы Қасым-Жомарт Тоқаев балаларға қатысты ойын былай түйіндеген болатын. «Балалар – мемлекетіміздің жарқын болашағының кепілі. Сондықтан да алдағы жылды «Балалар жылы» деп жариялау керек деп есептеймін. Әңгіме жалаң ұран мен мерекелік шаралар туралы емес. Бірінші кезекте билік тарапынан балаларды қорғау үшін денсаулық сақтау, білім беру, әлеуметтік қолдау бағытында нақты шаралар қолға алынуы керек. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз».
Облыс орталығында 2020 жылдың қараша айында облыстық білім басқармасы жанындағы Bolashaq Saraiy ашылған болатын. Қосымша білім беру ордасының қабырғасы қаланып, іші білім шұғыласымен нұрланғалы небәрі бір жылдан астам уақыт өтсе де, тамыры тереңге тартатын тарихтың алғашқы негізі қаланып үлгерді. Бұл орайдағы мақсат белгілі. Ең алдымен саналы, білімді ұрпақ тәрбиелеу. Сол арқылы еліміздің беделін асқақтататын ұлағатты ұлттың негізін қалыптастыру. Bolashaq Saraiy»-ында мектеп оқушылары мен студенттер спорт, шығармашылық, ІТ, медиа жастар мен жасөспірімдерді үйлестіру бағыттары бойынша өз білімдерін жетілдіруге толық мүмкіндік алып отыр.
Осы білім ордасының мүмкіндігін айта кетелік. Бір уақытта 1 175 білім алушы өзі қалаған бағыт бойынша шұғылдана алады. «А» блогы оқушылардың шығармашылықпен, ғылыммен айналысуына арналса, «Б» блогы саламатты өмір салтын ұстанып, спорттың әлденеше түрімен айналысады. Қазіргі таңда аталған білім ордасында 112 үйірме бар. Осы үйірмелерде 3 мыңнан астам оқушы білімін арттырып, спортпен шұғылдануда. Бір айта кетерлігі, әр топтағы балалардың саны шектеулі. Небәрі 15 балаға дейін. Бұл олардың еркін шұғылдануына мүмкіндік тудырады.
Қазақстан Республикасының Президенті Қасым-Жомарат Тоқаев қазіргі уақытта техникалық бағыттағы мамандықтардың артықшылығына айрықша мән беріп отыр. Өйткені, ел болашағы тікелей осы бағытқа байланысты. Балалардың техникалық білім алуына бар мүмкіндік қарастырылған. Айталық, ІТ бағытында 30 үйірме жұмыс істейді. Талдап айтатын болсақ, инженерлік бағыт бойынша «Авиамодельдеу» студиясы, STEAM, Tesla Club, Cybertron роботтехника шеберханасы, радиотехниктер клубы, New Generation энергетиктер клубы, New Generation электроншылар клубы, ақылды заттар әлемі, WeDo Club, Lego Club, Lego Mindstorms, Lego WeDo сияқты 12 үйірме бар. Ал техникалық бағыттағы кішкентайларға арналған алгоритм, үлкендерге арналған алгоритм, Python, JavaScript, IT клуб (веб негіздер), «3D модельдеу» шеберханасы, Компьютерлік дизайн, графикалық дизайн тәрізді 11 үйірме балалардың орасан зор қызығушылығын тудыруда. Техникалық шығармашылықтың инновациялық паркінде Wood art ағашпен жұмыс, «Верьф» кеме жасау, «Креатив» ағаш ұстасы, «Креатив» көркем ағаш ою, «Бабалар ізімен», Стендтік моделдеу бағытындағы үйірмелердің жұмысы үйіріліп тұр.
Мекемеде білім алушылар мекемеішілік сайыстар, тренингтер, кино көрсетілім, шығармашылық кештер, әртүрлі конференциялар мен форумдар және тағы басқа іс-шараға да қатысады. Жаңа білім ордасы ашылғалы оқушылар біршама жетістікке жеткен. Бұл сөзімізге дәлел ретінде жас талапкерлердің облыстық, республикалық, тіпті халықаралық деңгейдегі сайыстарға қатысып, жүлделі орындарға ие болып жүргендігін айта кетуімізге болады. Шығармашылық бағыттың шыңына шығуға ұмтылғандар Ресей, Беларусь, Латвия, Әзербайжан елдерінде өткен әртүрлі байқаудың бас жүлделерін алып үлгерді.
Спорт бағытының еркін күрес үйірмесінің балуаны Алдияр Балташев Беларусь Республикасында өткен есту қабілеті төмен спортшылар арасында чемпион атанды, жас футболшылар қала және облыс көлемінде аула футболынан топтық 3 орынды жеңіп алса, қазақ күресі үйірмесіне қатысатын бір топ балуан үлкенді-кішілі боз кілемнің үстіндегі белдесулерден олжалы оралып жүр.
Медиа бағытының тәрбиеленушілері де білім ордасында алған білімдерінің негізінде республикалық сайыстарда топ жарды. Ғылыми-интеллектуалды бағыттың оқушысы Тамила Жаббасова қоршаған ортаны қорғау және табиғи ресурстарды тиімді пайдалану бойынша Халықаралық ғылыми-экологиялық форумға қатысты.
Мекемеде 114 педагог қызмет етеді. Олардың арасында өз ісінің майталман мамандары – ғалымдар да бар. Бір сөзбен айтқанда, Bolashaq Saraiy балалардың болашағына кең жол ашып келе жатқан білім бағына айналып отыр.
Көкшетау қаласы
