29 жастағы жас ана Гунчигул Мухамет екі қыз және бір ұл бала босанды. Қос қыздың салмағы 2 145 грамнан болса, ұл 2 050 грамм салмақпен туылыпты.
– Үшемдерді жүктіліктің 34-аптасында кесарь тілігі арқылы босандырдық. Шақалақтардың жағдайы дұрысталғанша ерекше бақылауда болды. Ана мен бала перзентханада екі апта жатты. Қазір үшемдердің де, анасының да жағдайы бірқалыпты. Оларды үйлеріне шығардық, – дейді Алматыдағы облыстық көпсалалы клиникалық аурухана директоры Элмира Ахметова.
Енді Тайиповтар отбасының тұңғыштары – үшемнің амандығына Панфилов аудандық орталық ауруханасының дәргерлері жауапты болмақ. Яғни үшемдердің күтіміне орта медицина қызметкерлері көмек көрсетеді. Учаскелік дәрігер балалардың денсаулығын бақылауда ұстаса, үшемдерді аурухана арнайы тамақпен қамтамасыз етпек.
Айтпақшы, Алматы облысында бала туу көрсеткіші жыл сайын артып келеді екен. Оның ішінде егіздердің саны өсіпті. Мысалы, былтыр өмір есігін ашқан сәбилердің арасында 355 егіз бар екен. Ал облыста өткен жылы 2 үшем жарық дүниеге келген болатын.
Алматы облысы
