Мемлекет басшысы Қасым-Жомарт Тоқаев жуырда Парламент Мәжілісінде өткен жиында осынау маңызды шараның өз жемісін бермей отырғанын атап өткен еді. Дегенмен өңірде Президент тапсырмасын орындау мақсатында қолға алынған шаруа жүйеленіп келеді. Облыстық жер қатынастары басқармасының басшысы Бақтияр Көпбосынов цифрландыру сыбайластықты жаппай жоюды көздейтінін айтады.
«Осы орайда, Президент ақпараттық жүйені интеграциялау мемлекеттік органдарды қағазбастылықтан арылтып, қоғамның мемлекеттік органдарға сенімін арттыруға тиіс екенін айтты. Сондықтан да бизнеске жер телімдерін таңдау және бөлу рәсімдерін цифрлы форматқа көшіру бағытында Жамбыл облысында E-Jambyl доменді атауымен өңірлік геоақпараттық жүйе құрылды. Жүйеде облыстың барлық ауданының, ауылдық округтерінің және қалаларының аумағынан бос жер телімдерін көру мүмкіндігі қарастырылған», дейді Б.Көпбосынов.
Бұл ретте өңірлік геоақпараттық жүйе бойынша халыққа қолжетімді ақпарат алу үшін аймақтағы ауыл шаруашылығы мақсатындағы жерлерге түгендеу жұмыстары жүргізілген. Нәтижесінде,
1,1 млн гектар бос жер телімдері анықталып, жүйеге орналастырылған. Оның ішінде 20,8 мың гектар жер егістік алқаптар болса, 7 мың гектар шабындық және 1,07 млн гектар жайылымдық аймақ. Сондай-ақ өңірде құрылған геопорталға кәсіпкерлік мақсатындағы бос жер телімдері де орналастырылған. Бұл алдағы уақытта облыстағы қала мен аудан тұрғындары арасынан кәсіпкерлікпен айналысуға ниетті азаматтарға жер телімін көруге және таңдауға мүмкіндік туғызады. Басқарма басшысының айтуынша, қазіргі таңда жер қатынастары саласында халыққа 10 мемлекеттік қызмет түрі көрсетілуде. E-Jambyl геоақпараттық жүйесінде де сол қызметтерді цифрландыруға қатысты біршама жұмыс атқарылған. Нақты айтқанда, 8 мемлекеттік қызмет түрі автоматтандырылды.
Жалпы, жер мәселесі төңірегінде әңгіменің көбейгені рас. Оның ең қауіптісі – жең ұшынан жалғасқан жемқорлық. Өңірдегі жер қатынастарын реттеу мақсатында оны цифрландыру жүйесіне енгізу де сыбайластықты болдырмауды көздейді. Б.Көпбосынов облыста ашықтықты қамтамасыз ету және жемқорлықтың алдын алу немесе жою мақсатында және аукциондар мен конкурстарды қағаз жүзінде жүргізіп, сауда-саттыққа қатысушылардың наразылығын болдырмау үшін кешенді шаралар жүзеге асып келе жатқанын айтты.
«Ендігі кезекте жерді жалға берудің конкурстық жүйесін электронды форматқа көшіруге дайындық жұмыстары атқарылып жатыр. Айта кетерлігі, өткен жылы аймақта 15 аукцион ұйымдастырылып, 104 жер телімі 170,9 млн теңгеге сатылды», дейді ол. Жер мәселесіне байланысты жұмыстар алдағы уақытта да жалғаса береді.
Жамбыл облысы
