Жиынды ашқан Шымкент қаласы әкімінің бірінші орынбасары Шыңғыс Мұқан Мемлекет басшысының Жаңа Қазақстанды құру жөніндегі реформасы қоғам тұтастығы мен халық бірлігін нығайтудағы бірден-бір маңызды құрал екендігін атап өтті. «Алдымызда Жаңа Қазақстан құру жөніндегі мәртебелі міндеттер тұр. Еліміз дамудың жаңа кезеңіне қадам басты. Бұл кезең саяси және қоғамдық формацияның жаңаруымен жүзеге аспақ. Әр салада түбегейлі өзгерістер жүреді, жаңа көзқарас қалыптасып, жаңа тәсілдер қолданылады. Қазақстан халқы Ассамблеясы да жұмыс мазмұнын жаңартып, қоғамды топтастырудың тиімді жолдарын ұсынып, іске асыратынына сенімдімін», деді ол.
Кездесуде қатысушылар еркін форматта этносаралық қатынастар саласын дамытудың алдағы перспективалары туралы пікір алмасты. Сондай-ақ жастардың жұмыспен қамтылу деңгейін арттыруға жәрдемдесудің өзекті мәселелері, оның ішінде «Жастар Ассамблеясы» қоғамдық бірлестігінің алдағы жұмыс жоспарлары талқыланды.
Өз кезегінде Марат Әзілханов тұрақтылығымызды сақтауда, ынтымағымызды ыдыратып алмауда өңірлік ассамблея мүшелерінің айрықша рөлін атап өтіп, Ассамблея қызметін трансформациялауда Қазақстанның барлық этностарын белсенді атсалысуға шақырды.
Сондай-ақ Қазақстан халқы Ассамблеясы Төрағасының орынбасары Қазақстан өзбектерінің этномәдени бірлестіктері қауымдастығының өкілдерімен кездесу өткізді.
Іс-шараға Қазақстан Республикасы Парламенті Мәжілісінің депутаты Ф.Қаратаев, «Дустлик» республикалық өзбек этномәдени бірлестігінің құрметті төрағасы Р.Халмурадов, Қазақстан өзбектері «Дустлик» қауымдастығының төрағасы И.Хашимжанов, сондай-ақ өзбек этномәдени бірлестіктерінің төрағалары мен ақсақалдары, зиялы қауым өкілдері қатысты. Кездесу барысында Қазақстан халқы Ассамблеясы және оның құрылымдары өз қызметіндегі жаңа тәсілдерді қолдану, мемлекеттік тілдің біріктіруші рөлін арттыру және ҚХА жастар кадрлық резервін қалыптастыру нұсқалары, сондай-ақ этномәдени бірлестіктердің медиа-жұмысы талқыланды.
Өз кезегінде жиынға қатысушылар тұшымды ойларын ықшамдап ортаға салып өтті. Алдағы уақытта олардың барлығы құзырлы мемлекеттік органдарда пысықталып, ғылыми-сарапшылық алаңдарда талқыланатын болады.
Қазақстан өзбектері Мемлекет басшысының Жаңа Қазақстанды құрудағы барлық азаматтардың әл-ауқатын қамтамасыз етуге бағытталған жүйелі қадамдарын толық қолдайтынын және іске асыруда барынша қолдау көрсететінін атап өтті.
Өз кезегінде Марат Әзілханов «Дустлик» қауымдастығы өзбек этносының өкілдерін қазақстандық қоғамға біріктіру, оларды Қазақстанның Тәуелсіздігін нығайту процесіне тарту миссиясын жоғары деңгейде орындап жатқанын атап өтті.