Аймақта соңғы тәулікте індет жұқтырудың сексенге жуық жағдайы тіркелді. Облыс еліміз бойынша алтыншы орында. Жыл басынан бері 18 733 адамнан коронавирус зертханалық жолмен анықталып, 40-қа жуық адам індеттен көз жұмды. Ақпан айында ғана сақтық шараларын қолданбаудың кесірі көріне бастады. Қазір адамдардың еті өліп кеткен. Алғашқы беттегідей бетперде тағу, санитарлық талаптарды бұлжытпай сақтау босаңси бастады. Салғырттықтың салдары да көзге көрініп тұр. Ақпан айында 4 167 адам індетке шалдықты.
– Бүгінгі таңда облыс ауруханаларында 20-ға жуық науқас өте ауыр халде жатыр. Бір айта кетерлігі, індет жұқтырғандардың басым көпшілігі 60 жастан асқандар, – дейді облыстың бас санитарлық дәрігері Айнагүл Мусина, – өңірде жасы 60-тан асқан 100 мыңнан астам адам бар. Олардың 59 пайызы індетке қарсы екпе алса, 10 мыңнан астамы ревакциналаудан өткен. Сөз арасында ревакциналаудан өтпеген егде адамдар індет жұқтыра қалса, қауіппен күресу қиын болатынын тағы бір қайталап айтқым келеді. Ашығын айтқанда, мүлде екпе алмаған адамдар қаһарлы коронавирус былай тұрсын, «омикронға» да төзе алмайды. Ал егер уақытында вакцина алған болса, қай штамы болсын жеңіл өтеді.
Вакцина алуға барлық жағдай жасалған. Облыста қазір 133 пункт тұрақты жұмыс істеп тұр. Екпе науқаны басталғаннан бері вакцинаның бірінші компонентімен 347 946 адам егілген. Бұл облыс тұрғындарының 47,3 пайызы. Вакцина салдыру бойынша Егіндікөл ауданы мен Қосшы қаласының тұрғындары жоспарды 100 пайызға орындап, көш бастап келеді. Бас санитарлық дәрігердің айтуына қарағанда, халыққа қолайлы болуы үшін екпе пункттері жанынан жылжымалы бригадалар да ұйымдастырылған. Олар жүкті әйелдер мен бала емізетін аналардың, зейнеткерлердің, мүмкіндігі шектеулі жандардың өтініші бойынша үйлеріне барып екпе егеді.
– Бүгінгі таңда 8 805 адам Pfizer вакцинасын алды. Бұл – өте төмен көрсеткіш. Қазір біз жасөспірімдер арасында да індеттің етек алып бара жатқанын көріп отырмыз. Жыл басынан бері мектеп оқушылары арасында індетке душар болу деректері көбейіп кетті. Тіпті студенттерге қарағанда, оқушылардың арасында алаңдатарлық жағдай туындап отыр. Мұның барлығы екпе алмағанның кесірі. Балалардың бойында індетке қарсы иммунитеттің болмауы осындай олқылыққа жол беріп отыр, – дейді бас санитарлық дәрігер.
Егер вакцинаның бірінші компонентін алғандар 21 күннен кейін екіншісін салдырмайтын болса, онда олардың Ashyq қосымшасындағы мәртебелері көк түске өзгереді. Әзірге «сары аймақтың» санатында болғанымызбен, қауіптің қатері қаперімізде жүргені жөн.
Ақмола облысы
