Болгарияда өткізілген грек-рим күресі өз мәресіне жетті

Болгарияның Пловдив қаласында грек-рим күресінен жастар арасында өткен «Петко Сираков-Иван Илиев» XVII халықаралық турнирі аяқталды. Бұл туралы Спорттық жекпе-жек және күш қолданатын спорт түрлері конфедерациясы хабарлады. Аталған сайысқа Әзербайжан, Болгария, Хорватия, Венгрия, Жапония, Қазақстан, Румыния, Ресей, Сербия, Словакия, Түркіменстан мен АҚШ құрамасының балуандары қатысты. Осы додада сегіз салмақтың жетеуінде қазақ балуандары 2 алтын, 4 күміс және 3  қола медальді иеленді. Турнирде Қанағат Ақылбек 50 кило салмақ дәрежесінде жеңімпаз атанды. Ол финалда отандасы Мейрамбек Нәдірбаевтан басым түскен болатын. Нәдірбаев сәйкесінше күміс жүлдеге ие болды. Ал 74 кило салмақ дәрежесінде күш сынасқан Темірлан Шадукаев бас жүлдені иеленіп, Мирас Баршалықов күміс медаль алды. Сондай-ақ, тағы екі күміс жүлдені Дамир Зарлыханов (55 кг) пен Мансұр Шадукаев (120 кг) иеленді. Ал Рамазан Мұстафаев (74 кг), Мейрамбек Айнағұлов (60 кг) пен Вячеслав Фатеев (66 кг) қола медальді қанағат тұтты. Дастан Кенжалин. Дереккөз: confederation.kz Фото: www.1 news.az.