Алматыны дамыту әрдайым басты назарда

Мемлекет басшысы Нұрсұлтан Назарбаевтың төраға­лығымен Алматы қаласын дамыту жөнінде кеңес өтті, деп хабарлады Президенттің баспасөз қызметі. Кеңес барысында қаланың 2013 жылғы әлеуметтік-эко­но­микалық дамуының қоры­тын­дылары, сондай-ақ, алдағы ке­зеңге арналған жоспарлар қаралды. Өз сөзінде Нұрсұлтан Назар­­баев мегаполисті дамыту мәсе­­­ле­лері мемлекеттің әрдайым басты назарында болатынын атап өтті. – Алматы – еліміздегі ірі мегаполис. Оның дамуы Астанамен бірдей деңгейде болуға тиіс. Нақ осындай мегаполис қана ғылым, инновация және білімді дамытудың орталығы болып табылады. Алматы экономика, шағын және орта бизнес, қала құрылысы салаларында көшбасшылық рөлін сақтап келеді. Тұрғындарының саны бір жарым миллиондық межеге таяған қалада біз эколо­гиялық тазалық жайын ойлауымыз керек. Автомобильдер саны артуда, бұл көлік қозғалысын ұйымдастырудың жаңа тәсілдерін қажет етеді. Соңғы жылдары айналма көлік жолдары көптеп салынуда, соның арқасында көлік қозғалысының жай-күйі айтарлықтай жақсарды. Сондай-ақ, қаланы дамытудың өзекті мәселелері білім мен ғылым салаларын, жаңа туристік және мәдени нысандарды құру ісін қамтиды. Біздің жұмысымыздың басты бағыты – халықтың әл-ауқатын жақсарту, – деді Мем­лекет басшысы. Қазақстан Президенті көлік қозғалысын басқару, сондай-ақ, сәулеткерлік талаптарды сақтау жөнінде әлемдік үздік тәжірибені қолдану қажеттігіне назар аударды. Атап айтқанда, қаланың сейсмикалық ерекшелігін ескеріп, эстетикалық тартымдылықты сақ­тау және архитектуралық есеп­теу­лер жүргізу қажеттігі атап өтілді. Мемлекет басшысы қаланың криминогендік жағдайына қатыс­ты 53 мың қылмыс тіркелгеніне, оның 80%-ы ашылмағанына, бірақ бұл ретте жасөспірімдер қылмы­сы көбейгені байқалатынына тоқ­талды. Осыған байланысты, әкімдіктің өтінішімен ішкі істер департаментінің штаты едәуір кеңейді, алайда, 500 орын әлі де бос тұр. Қазақстан Президенті Алма­тының тұрғындары мен қонақ­­тарының қауіпсіздігін қамта­масыз етуді тапсырды. Ол жол-көлік оқиғаларының саны 3 есе артып, 7 мыңға жеткеніне назар аударды. – Осы орайда, жол-көлік оқиғаларына танымал адамдардың балалары мен туыстарының жиі қатысы болатыны туралы деректердің де аз емес екенін ерекше атап өткім келеді. Заң алдында барлығы бірдей, сондықтан мұндай жағдайларда балаларды да, ата-аналарын да барынша қатаң жазалау керек, – деді Мемлекет басшысы. Нұрсұлтан Назарбаев Алматы бүкіл елімізде жүзеге асырылып жатқан «Қазақстан-2050» Стра­те­гиясын іске асыруға қомақ­ты үлес қосуға тиіс екенін атап көрсетті. – Қалада индустриялық-инновациялық даму, жұмыспен қамту, тұрғын үй-коммуналдық шаруашылықты жаңғырту, ден­­­саулық сақтау және білім беру салаларында барлық негізгі мем­­­­­­лекеттік бағдарламалар іске асырылуда. Алматы осы бағыттардың бәрінде басты рөл атқаруға тиіс, – деді Мемлекет басшысы. Қазақстан Президенті қалада көп ұлт өкілдері тұратынына орай Қазақстан халқы Ассамблеясының жұмысына назар аударудың маңыздылығын айтты. – Біздің барлық бағдарла­ма­ларымызда Алматының орны ерекше. Бұл қала – Тәуелсіздігіміздің бесігі. Алматыға Астана сияқты бәсекелестің пайда болуын жа­ғымды фактор деп санаймын. Қала мемлекеттің бюджетіне зор үлесін қосып келеді және қазіргі кезде мемлекет те түрлі нысандардың құрылысы мен инфрақұрылымдар үшін мол қаражат инвестициялауда. Қосқан үлес осылай қайтарылады және ол жыл сайын артып отыруға тиіс. Қала зор перспектива мен әлеуетке ие, оны іске асыру қажет. Негізгі мегаполис бола отырып, оның алдағы уақытта да дами беретініне сенімдімін, – деді Нұрсұлтан Назарбаев. Өз баяндамасында А.Есімов барлық көрсеткіштер бойынша, атап айтқанда, өнеркәсіп, көлік, сауда және қызмет көрсету салаларында өсім байқалатынын атап өтті. – Соңғы 5 жылда өңірлік жалпы өнім 2 есе өсіп, 6,4 трлн. тең­ге­ге дейін артты, бұл – жан басына шаққанда шамамен 27 мың доллар. Салық түсімдері – 1 трлн. 360 млрд. теңге, бұл 2012 жылмен салыстырғанда 13%-ға жоғары, – деді Алматы қаласының әкімі. А.Есімов қаланы дамытудың перспективалық үш бағыты – Инно­вациялық технологиялар паркіндегі еркін экономикалық аймақ, Алатау ауданындағы индус­триялық аймақ және туризмді дамыту бағыттары белгіленгені жөнінде хабардар етті. Әкім қаланың экологиялық ахуалын жақсарту және ауаның лас­тануын азайту жөніндегі тапсырма ерекше бақылауда тұрғанына тоқталды. – Метрополитен құрылысы жалғасуда, биыл 2 жаңа станса іске қосылады. 2013 жылы 6 айналма жол пайдалануға берілді, биыл 3-еуі салынады, сондай-ақ, тағы 4 айналма жолдың жобалық-сметалық құжаттамасын дайындау ісі аяқталады. Қалада 2017 жылғы Универсиадаға дайындық жұмыстары қызу жүріп жатыр. Биыл 12 мың орынға арналған мұз сарайының, 3 мың адамға арналған стадионның және атлеттер қалашығының құрылысы бас­талады. Міндет – барлық нысанды 2016 жылдың тамызында аяқтау. Сіздің тапсырмаңызға сәйкес біз 2022 жылғы Қысқы Олимпиаданы Алматыда өткізуге өтінім бердік. Мемлекеттегі тұрақтылық пен экономикалық дамудың арқасында оны өткізуге қаламыздың нақты мүмкіндіктері бар, – деді А.Есімов. Соңында Алматы қаласының әкімі Мемлекет басшысының қолдау көрсетуі арқасында қаланың экономика және әлеуметтік са­ла­ның іс жүзінде барлық бағы­ты бойынша дамуы жақсы қар­қын алғанын, сондай-ақ, осы қарқынның сақталуы үшін барлық күш-жігер жұмылдырылатынын айтып өтті. ----------------------------------------- Суреттерді түсіргендер С.БОНДАРЕНКО, Б.ОТАРБАЕВ.