ҚРКФ төрағасының тапсырмасы бойынша Қызылорда облысының кәсіподақтар орталығының өкілдері Марат Бәйімбетов пен Майра Боранбаева облыстық еңбек инспекциясымен бірге сот процесі барысында жұмысшыларды қорғауға белсене қатысты. Сонымен қатар Кәсіподақтар орталығының бастамасымен бұл мәселе әлеуметтік әріптестік жөніндегі облыстық үшжақты комиссияның қарауына шығарылып, кәсіподақ алаңында жұмыс берушімен де бірнеше рет талқыланды.
Жуырда сот жұмыс берушінің жұмыскерлермен еңбек шартын бұзу әрекетін заңсыз деп танып, істі тоқтатты. Қызылорда қалалық сотының судьясы М.Тоғызбаева азаматтарды өз жұмыстарына қайта тұруы және мәжбүрлі бос жүрген уақыттарына жалақы төлеу туралы арыздарын қанағаттандыру туралы білікті, әділ шешім шығарды.
Сот жұмыс беруші еңбек шартын бұзғанда басшылыққа алған еңбек шартын Еңбек кодексінен 2020 жылғы 4 мамырдағы өзгерістермен алынып тасталған 50-баптың 3-тармағы бойынша бұзуы заңсыз, бұл норма азаматтардың еңбек құқығын нашарлататын норма деп таныды.
Құқықтары қорғалған жұмыскерлердің бірі Азамат Қалжанов әріптестерінің атынан әлеуметтік-еңбек құқықтарын қорғауға атсалысқан кәсіподақтарға алғысын білдірді.
«Сот процесі біздің, яғни жұмыстан негізсіз босатылған 12 жұмыскердің талап арыздарын толық қанағаттандырды. Әділдік жеңді. Сот төрағасының шешімімен біз жұмысымызға қайта орналастық. Кәсіподақтардың көмегінсіз біз бұған қол жеткізе алмас едік. Біздің мұңымызды, наразылығымызды тыңдап, сонау 2021 жылдың қыркүйек айынан бастап, өз қолымен жетектеп, әр есіктің, әр мекеменің табалдырығын тоздырып, мезгілсіз болса да, бос уақытының барлығын бізге арнап көмек көрсетіп келген, әлі де көмектесуден тайынбайтын Кәсіподақтар орталығының өкілдері Марат Бәйімбетов пен Майра Боранбаеваға 12 жұмыскердің және олардың отбасынан, ағайын туыс-бауырларынан шексіз алғыс!», дейді Азамат Қалжанов.
Айта кету керек, бастамашыл топ мүшелері алдағы уақытта кәсіподақ ұйымын құруды жоспарлап отыр. Бұл еңбек ұжымындағы жағдайдың одан әрі дамуы Қазақстан Республикасы Кәсіподақтар федерациясының бақылауында болады.
