![Қазақстан Президенті Мысыр Араб Республикасының Президентімен телефон арқылы сөйлесті](/media/2022/02/24/as-sisi-abdul-fattakh-khalil-telefon_mediumthumb.jpg)
Қасым-Жомарт Тоқаев қазақ-мысыр қатынастарының тамыры терең болғанымен, екі ел арасындағы заманауи дипломатиялық қатынастардың орнағанына биыл 30 жыл толғанын атап өтті. Осы мерзім ішінде екіжақты ынтымақтастықтың әртүрлі саласы бойынша бірқатар жетістіктерге қол жеткізілді.
Қазақстан Президенті екі ел арасындағы байланыстарының әлеуеті әлі де толық көлемде пайдаланылмай отырғанына назар аударып, мысыр тарапын сауда-экономика саласындағы ықпалдастықты дамытуға шақырды.
Сонымен қатар, Мемлекет басшысы қаңтар оқиғаларына қатысты алаңдаушылық танытып, ниеттестік білдірген Мысыр Президенті Әбдел Фаттах ас-Сиси мен барша мысыр халқына алғысын жеткізді.
Қасым-Жомарт Тоқаев еліміздегі жағдайдың тұрақталғанын атап өтіп, әлеуметтік-экономикалық қайта құрудың жаңа стратегиясын жүзеге асыру шаралары қабылданғанын айтты.
Әңгіме соңында Мемлекет басшысы Мысыр Президентін Қазақстанға өзіне қолайлы мерзімде сапармен келуге шақырды.