Коллажды жасаған Амангелді Қияс, «EQ»
Президентке берген есебінде облыс әкімі экономиканың негізгі көрсеткіші – жалпы өңірлік өнім көлемінің өсімі былтыр 2020 жылмен салыстырғанда 4,7 пайызға артқанын айтып өтті. Ауыл шаруашылығы саласында 906,5 млрд теңгенің өнімі өндіріліп, өсім 101,7 пайыз болған. Бұл нәтиже облыстың республикадағы үлесі бойынша екінші орынға шыққанын көрсетеді. «Қарапайым заттар экономикасы» бағдарламасы аясында 315 жоба қаржыландырылған. Өңірдегі құрылыс жұмыстарының көлемі алдыңғы жылмен салыстырғанда 4,1 пайызға артқан. Түркістан қаласын түркі әлемінің мәдени-рухани орталығы ретінде қалыптастыру жұмыстарының бірінші кезеңі аяқталып, әлеуметтік инфрақұрылымның негізі қаланған. Облыстың 2021-2025 жылдарға арналған жаңа кешенді жоспары бекітілген. Қасым-Жомарт Тоқаев Түркістан облысында атқарылып жатқан жұмыстарға оң баға бере отырып, қолға алынған жобаларды жалғастыруды және халықпен тығыз жұмыс істеу мәселесін күшейтуді тапсырды.
Халықпен тығыз жұмыс істеу мақсатында қолға алынған, Президентке баяндалған «Парасат» пікірталас клубы жобасы Сайрам ауданының әкімі Ұласбек Сәдібековтің бастамасы екенін бұған дейін жазған болатынбыз. Қоғамдағы өзекті мәселелерді талқылауды мақсат тұтқан пікірталас клубының VI кезекті отырысы жақында Сайрам ауданы Қарабұлақ ауылында өтіп, жастар тәрбиесі тақырыбына арналды. Жиынға облыс әкімінің орынбасары Сәкен Қалқаманов, облыстық, аудандық мәслихат депутаттары, қоғам белсенділері, зиялы қауым өкілдері, жастар және облыстағы барлық аудан, қала әкімдерінің идеология жөніндегі орынбасарлары, ішкі саясат бөлімдерінің басшылары қатысты. Пікірталас клубында жастар өз ойларымен бөлісіп, өзекті мәселелерді ортаға салды. Әсіресе, жұмыссыздық жайы көп айтылды. Өңірде жаңа жұмыс орындарын ашып, жастарды тарту аса маңызды. Отырысқа өндіріс орындарының басшылары да қатысқан болатын. Олар жұмыс орындарына білікті, білімді мамандарды қабылдауға мүдделілік танытып, жастардан өз ісіне деген сүйіспеншілікті, ізденісті талап ететінін айтты. Сондай-ақ жиында жастар арасында суицидтің жиілеп тұрғаны да айтылды. Облыс әкімінің орынбасары Сәкен Қалқаманов бүгінде тиісті орындар осы мәселемен жүйелі түрде айналысуда екенін жеткізді. Атқарылған жұмыстар нәтижесінде өз-өзіне қол жұмсау деңгейі өткен жылдармен салыстырғанда айтарлықтай төмендеген. Ал аудан әкімі Ұласбек Сәдібеков жастар мәселесін шешу мақсатындағы бірқатар ұсыныстарын ортаға салды. Мысалы, аудан орталығы Ақсукентте жастар орталығын ашу қажет. Осыған орай екі қабатты ғимаратты күрделі жөндеуден өткізу үшін жергілікті бюджеттен қосымша қаржы қарастырылуда. Ол орталықта баспасөз мәслихаты, дөңгелек үстел отырыстарына арналған мәжіліс залы және жастар ресурстық орталығы қызметкерлеріне арнайы жұмыс бөлмесін ашу жоспарлануда. Сондай-ақ аудан әкімі жастармен еркін форматтағы кездесулер ұйымдастыру, еріктілердің жұмысын жандандыру қажеттігін айтты. «Бізде жастармен жүргізілетін жұмысқа жыл сайын 5 млн теңге қарастырылады екен. Енді бұл қаржы көлемін 31 млн теңгеге дейін ұлғайтамыз. Қоғамда жастардың рөлін арттыру мақсатында түрлі бағыттағы жиындарға, кездесулерге белсенді жастар өкілдерін қарастыру, спикерлерді дайындап көшбасшыларды анықтау да маңызды. «Парасат» пікірталас клубының құрамына арнаулы оқу орнында және салаларда еңбек ететін, сондай-ақ әлеуметтік желілерде белсенділігі жоғары жастарды тартып тиімді жұмыстар жүргізуді жоспарлап отырмыз. Ауылдық округтерде «Әкелер мектебі» жастар ресурстық орталығымен бірлесіп жұмыс атқаруы керек. Жастар арасындағы құқықбұзушылық, ерте жүктілік секілді мәселелерді қатаң бақылауға алу, имамдар мен теологтердің жастардың діни көзқарасын назарда ұстап, теріс діни ағымдарға түсіп кетуіне жол бермеуі де маңызды. Жастардың бос уақытын тиімді пайдалану мақсатында атқарылар жұмыстар да аз емес», деді Ұласбек Сәдібеков.
Жоғарыда айтып өткеніміздей, Сайрам ауданындағы бастама өңірде кеңінен қолдау табуда. Мысалы, жуырда Түлкібас ауданында «Парасат» пікірталас клубы құрылып, орталық мәдениет үйінде алғашқы отырысы өтті. Бірінші отырыстың күн тәртібінде ағын су мен жайылым жерге қатысты өзекті мәселелер қаралды. Қоғам белсенділері мен ардагерлер және қоғамдық ұйым өкілдері тарапынан жер, ауыз су, елді мекендерге ағын су келетін арық-атыздардың тазалығы, жарнамалардың қазақ тілінде сауатты жазылуы сынды мәселелер де көтерілді. Ал Арыс қаласында өткен «Парасат» пікірталас клубының алғашқы отырысында алдымен «Әжелер алқасының» белді мүшелері жастар мен бала тәрбиесі жайында арнайы баяндама жасап, көпшілікті ашық пікір алмасуға шақырды. «Қаламыздағы өзекті мәселелерді осындай басқосуларда ашық талқылап, халық арасында кеңінен түсіндіру жұмыстарын жүргізіп, шешу жолдарын қарастырғанымыз жөн», дейді қала әкімі Гүлжан Құрманбекова.
Ал Қазығұрт ауданында құрылған «Парасат» пікірталас клубының алғашқы отырысын аудан әкімі Арман Абдуллаев жүргізіп отырды. «Парасат деген салмақты сөз. Бірінші өзіміз парасатты болуымыз керек. Пікірталас мақсаты – ортаға салынған мәселелерді зерттей отырып, ақиқатты айту, талас мәселенің шешімін іздеп табу. Пікір алмасу – дұрыстыққа көз жеткізудің ең тиімді тәсілі. Айтқан сөзіміз, көтерген мәселеміз – жеке басымыз емес, көпшіліктің қамына бағытталуға тиіс», деді аудан әкімі. Пікірталас клубының әрбір отырысында аудан тұрғындарын сапалы ауыз су, табиғи газ, электр энергиясымен қамту, жер мәселесі, қоғамдық-саяси ахуалды тұрақтандыру, этносаралық қарым-қатынастарды нығайту, әлеуметтік аз қамтамасыз етілген отбасыларды қолдау шаралары туралы, әлімжеттік, сыбайлас жемқорлыққа қарсы күрес бағытындағы өзекті мәселелер ортаға салынбақ. Ал Сайрам ауданында клубтың келесі отырысында қаржы пирамидасы, жедел қаржы беру мекемелерінің заңсыз әрекеттері талқыланады.
Айта кетелік, пікірталас клубының отырыстарында жергілікті жердегі өзекті мәселені ортаға салушы тұрғындар Мемлекет басшысы елдегі азаматтардың арыз-өтініштерін ескеретін, «Халық үніне құлақ асатын мемлекет» қағидасын дамытып, әлеуметтік мемлекет құруды, баға тұрақсыздығы мен қымбатшылықты ауыздықтауды, олигархиялық әділетсіз жүйені жоюды стратегиялық міндеттер ретінде алуы – елді тұрақтылық пен бейбітшілікке, экономикалық даму мен гүлденуге алып баратынына сенім білдіруде.
Түркістан облысы
