Тарих қойнауына енген әр ғасырдың өзіндік ерекшелігі, маңызды оқиғалары бар. Әдебиет пен өнер тарихының жылнамасында есімдері мен шығармалары хатталып, фото-суреттермен айқындалған деректер жеткілікті. Бабалардан қалған әрбір жәдігер – тұнып тұрған тарих, ал сурет – тарих айнасы.
Жүз жасаған Жамбыл – ұлтының ғасырлық шежіресі. Қазақ-кеңес ақын-жазушыларының арасында бүкіл Одаққа және жер жүзіне ең алғаш есімі таралған Жамбыл болған. Шығармалары француз, ағылшын, неміс, чех, поляк, қытай және басқада тілдерге аударылған.
Бұқар жырау атындағы әдебиет және өнер музейінің басшысы Ербол Қайыровтың айтуынша, музей қорында Жамбыл мен жазушы Всеволод Ивановтың бірге түскен фото-сурет сақтаулы. Оның өзіндік тарихы бар екен.
– 1936 жылы Мәскеу қаласында қазақ әдебиеті мен өнерінің бірінші онкүндігі өтіп, оған Жамбыл Жамабаев та қатысады. Қазақстандық өнерпаздарды Мәскеу қаласындағы Қазан теміржол вокзалында салтанатты түрде қарсы алады. Жамбыл ақынмен кездесуді көптен күтіп жүргендердің арасында жерлес жазушы Всеволод Иванов та бар еді. Ол Павлодар облысы Аққулы ауданының тумасы, жазушы, публицист. Вокзалдың арнайы залында отырып, Жамбыл Жабаевпен сұхбаттасып, кейін 1938 жылы «Жамбыл» және «Ән салтанаты» атты мақала жазып, сол кездегі «Правда», «Известия» газеттеріне шығарды. Бұл фото сол кездесуде түскен.
Жерлес жазушы сол жылдың тамыз айында Алматыға келіп, Бейімбет Майлин және Ғабит Мүсіреповпен бірге «Амангелді» фильмінің сценарийін жазады. Енді тағы бір қызықты оқиға. Фильм түсіріліп жатқан уақытта Жамбыл ақын келіп тамашалаған екен. Сол кезде ақынның жанына адамдар отыра қалып, Амангелді Имановтың сарбаздары өтіп жатқан уақытты тамашалап отырған кезін түсіріп, фильмге қосады. Мұны біреу білсе, бірі білмес, тіпті сол фильмде қолында домбыра ұстаған қарияның Жамбыл екенін де аңғармауы мүмкін. Бұл туралы журналист, аудармашы Александр Назаровтың «Первенец казахского кино» кітабында жазылған, – дейді Ербол Қайыров.
