Мен қашанда Президенттің үндеулерін, жолдауларын мұқият тыңдап, оқып, ал қабылдаған шешімдерін ойымда таразылап жүремін. Өйткені Мемлекет басшысының сөздері, берген тапсырмалары еліміздің бүгіні мен болашағына тікелей байланысты.
Күні кеше еліміздегі жетекші партияның кезектен тыс съезі өтіп, онда бірқатар мәселе қозғалды. Осы съезде саяси партияның аты өзгеріп, ол Amanat деген мән-мағынасы терең атауды иеленді. Бұл өз кезегінде партияның атымен қоса заты да өзгеретінін, тың бағытта, уақыт талабына сай жұмыс істеуге бетбұрыс жасауға кіріскенін білдірсе керек. Өйткені ненің болса да атына заты сай болғаны абзал ғой.
Халық Amanat-тан үлкен нәтиже күтеді. Ел-жұрт аталған партия өзінің белсенділігін арттыра отырып, билік пен халық арасын байланыстырушы алтын көпір, қоғамдық үнқатысу алаңы болғанын қалайды.
Ең алдымен кадр саясатын атап өтпеске болмас. Саяси ұйымның атқарушы хатшысы Асхат Ораловтың ұйымдастыруымен, Президенттің қатысуымен өткен съезде ұйымның басшылық құрамы партияны қайта құру туралы ұсыныстарды өз деңгейінде дайындады. Бұл ұсыныстарды Президент, партия Төрағасы Қасым-Жомарт Тоқаев та, партияның жоғарғы органы – съезде қолдады.
Біз қазір партияның алдында ауқымды міндеттер тұрғанын түсінеміз. Ұйым өзінің мойынына үлкен жауапкершілік алғанын сезіне отырып, халықтың сенімінен шығады әрі батыл және сауатты қадамдарымен жас ұрпаққа дұрыс жол көрсетеді деп ойлаймын.
Алқалы жиында белгілі болғандай, партия жанындағы қоғамдық кеңестердің санын қысқарту шешімі де көптің көңілінен шықты. Бұл күштерді жұмылдыру және жауапкершілік аймақтарын бөлуді білдіреді.
Өзім екі республикалық кеңестің мүшесімін. Бұл бастаманы толық қолдаймын. Қысқартылған құраммен де жақсы көрсеткіштерге, нәтижелерге жетуге әбден болады.
Бастауыш партия ұйымдарының жұмысын қайта ұйымдастыру мәселесіне тоқталсақ, жарналардың 20 пайызы тікелей бастауыш ұйымдарға қайтарылатын болады, бұл партиялықтардың жауапкершілігі мен қатысуын, сондай-ақ жобаларды іске асыру деңгейін арттырады.
Жиында айтылған ұсыныстардың бірі – мобильді қосымша туралы болды. Нақтылай айтқанда, Talqylau жаңа диалог алаңы, сондай-ақ партиялық баспасөз орталығы халықпен коммуникация және кері байланыс арналарын іске қосады, бұл бүгінгі күні бірінші кезектегі басымдық берілуі тиіс бағыт.
Бағдарламаның индикаторлары мен бөлімдерін нақты партиялықтарға бекіту бізге тағы да әркімнің дербес жауапкершілігі рөлінің артуын көрсетеді.
Бірқатар жаңа партиялық жоба, сондай-ақ партияның жастар қанатының жаңа жобалары туралы да сөз болды. Бұл туралы айтуға әлі ерте. Өйткені жұмысты бастауға және алғашқы нәтижелерге қол жеткізуге мүмкіндік беру керек.
Бағыттардың өзектілігі және осы жобалар шеңберіндегі түйткілді мәселелерді қамту жаңа тәсілдерді қажет етеді. Осы ретте Президенттің қатысуымен жастар қанаты форумының ұйымдастырылғанын күтеміз. Мемлекет басшысы жастар форумына арнайы қатысса деген тілек бар. Менің ойымша, Мемлекет басшысы патриот жастарды шабыттандырып, болашаққа дұрыс бағыт береді.
Жалпы, партия жұмысы одан әрі жанданады деген сенім мол. Біз жұмыс істеуге, өзгеруге дайын екенімізді айтқым келеді. Бір-бірімізге қолдау көрсетіп, өзара сенім білдіру де маңызды екенін ұмытпайық.
Айсұлу ЕРНИЯЗОВА,
«Қазақстан еріктілер лигасы» ҚҚ жетекшісі
