Семей футбол мектебі түлегінің есімі қазақстандық жанкүйерлерге жақсы таныс. Ол ұлттық құрамада ең көп матч (55) өткізген ойыншылардың бестігіне кіреді. Бірнеше рет ұлттық құраманы капитан ретінде алаңға бастап шыққан болатын. 41 жастағы жерлесіміз өзінің клубтық мансабында «Елім-ай», «Ертіс», «Қайрат», «Локомотив», «Ордабасы», «Шахтер», «Атырау», «Алтай», сондай-ақ ресейлік «Ростсельмаш» және мәскеулік «Динамо» командаларында ойнады.
Карпович бапкерлік мансабын «Қайрат» клубының жүйесінде бастап, одан кейін екі жыл Көкшетаудың «Оқжетпесін» жаттықтырды. Ал 2021 жылдың басынан бастап Петропавлдың «Қызылжарын» жаттықтырып келеді. Ел чемпионатының былтырғы маусымында «Қызылжар» турнир кестесінде 4-орынға табан тіреп, Еурокубок жолдамасын жеңіп алған еді.
Ұлттық құраманың жаңа бас бапкері үшін алғашқы сынақ 24 наурызда Молдова құрамасына қарсы ойында болады.
