Аталған шара қайраткердің өмірі мен шығармашылығына арналды. Конференцияға Жамбыл облысы әкімінің орынбасары Дәулет Кәрібек, Д.Қонаев атындағы Халықаралық қордың вице-президенті Болат Байбол, облыстық «Қонаев қорының» төрағасы Әлімбек Жұмабаев, Талас ауданының әкімі Қанатбек Мәдібек және ардагерлер мен зиялы қауым өкілдері қатысты.
Жиында жазушы, Қазақстанның еңбек сіңірген қайраткері Көсемәлі Сәттібайұлы, филология ғылымдарының докторы, профессорлар Сәмен Құлбарақ, Меруерт Көпбаева, тарих ғылымдарының кандидаты, доцент Ермек Серікбаев және Талас аудандық билер кеңесінің төрағасы Сәулембай Әбсадықұлы баяндама жасап, Д.Қонаевтың жалпы өмір жолындағы өнегелі істері мен ел үшін сіңірген еңбегін атап өтті. Сондай-ақ Д.Қонаев атындағы Халықаралық қордың вице-президенті Болат Байбол қайраткердің өнегелі өмірін жастарға үлгі ету, насихаттау қажеттілігін айтса, облыс әкімінің орынбасары Дәулет Кәрібек ел экономикасы мен мəдениетін дамыту жолында аянбай еңбек еткенін жеткізді. Конференция соңында бірқатар азаматтар Дінмұхамед Қонаевтың 110 жылдық мерекелік медалімен марапатталды.
Бұдан кейін Қаратау қаласының орталығынан Дінмұхамед Қонаев атындағы музей ашылды. Нысан заманауи үлгіде салынған. Мұнда көрнекті тұлғаның өзі пайдаланған бірқатар заттарымен қатар, қайраткердің өмір жолынан сыр шертетін фотосуреттер, кітаптар және өзге де құжаттар қойылған. Нысанның жалпы ауданы 216 шаршы метрді құрайды. Ғимарат үш бөлмеден тұрады. Аталған мұражайдың лентасын облыс әкімінің орынбасары Дәулет Кәрібек, Д.Қонаев атындағы халықаралық қордың вице-президенті Болат Байбол мен облыстық «Қонаев қорының» төрағасы Әлімбек Жұмабаев қиды. Сондай-ақ музейдің ашылу салтанатына арнайы келген Болат Байбол Дінмұхамед Ахметұлының киімдерін, чемоданы мен қолданған ыдыс-аяқтарын және көрнекті тұлғаның жазған кітаптарын мұражайға тарту етті.
Жамбыл облысы
