«Жағдай өте қиын, белгісіздік деңгейі де орасан. Сыртқы секторда ең жағымсыз қауіп-қатерлер мен геосаяси тұрғыда тәуекелдер пайда болды. Біз үкіметтердің, орталық банктердің, қаржы және басқа да ұйымдардың Ресей Федерациясына қарсы санкцияларға қатысты мәлімдемелерін бақылап, осы санкциялардың Қазақстанға қалай әсер ететінін бағалап отырмыз. Қазақстанда қаржы және баға тұрақтылығын қамтамасыз ету үшін барлық қажетті шараны қабылдайтын боламыз», деді Ғ.Пірматов.
Ақпан айында базалық мөлшерлеменің 13,5%-ға дейін кезектен тыс көтерілу себептерін түсіндірген Ұлттық банк басшысы Ресей негізгі сауда әріптесіміз екенін, рубль бағамының әлсіреуі теңгеге де қысым көрсеткенін, мұндай жағдайда Қазақстанда базалық мөлшерлемені жедел арттыру сыртқы күйзелістер салдарының ел экономикасына таралуының алдын алуға қажетті шара болғанын атап өтті.
«Біз қабылдаған жедел шешім теңгенің айырбастау бағамына көрсетілетін қысымды, атап айтқанда, алыпсатарлық қысымды төмендетуге мүмкіндік беріп, инфляциялық және девальвациялық күтулердің өсуін болдырмауға бағытталды. Мұндай дағдарыс жағдайларында жауапкершілікті өз мойнымызға алуға дайын екенімізді көрсету маңызды. Біз өз әрекеттерімізді, саудадағы өзгерістер мен интервенциялар туралы ақпаратты ашық жариялап, нарықпен бөлісеміз. Менің ойымша, бұл дәл қазір өте маңызды. Бұл бізге ақша-кредит саясатын жүргізуге көмектеседі: ашық диалог пен іс жүзіндегі әрекеттеріміздің жариялылығына қарап-ақ, нарықтың кәсіби қатысушылары Орталық банктің не істеп жатқанын және Қазақстанда қаржылық тұрақтылықты сақтау үшін қажетті барлық шешімді қабылдауға дайын екенін білгені жөн», деді Ұлттық банк төрағасы.
Ғ.Пірматов қазіргі базалық мөлшерлемені сақтау жөнінде шешім қабылдауға әсер еткен факторлар туралы айта келіп, күрт өзгеріп жатқан жағдайды және бұрын-соңды болмаған белгісіздік деңгейін ескеріп, белгілі бір уақытқа үзіліс жасалғанын жеткізді. Бұл уақыт негізгі ішкі және сыртқы макроэкономикалық индикаторлардың осы күтпеген өзгерістерге ықпалы жөнінде жаңа ақпарат жинауға мүмкіндік береді.
«Ахуал түбегейлі нашарлаған жағдайда бізде пайыздық саясат шеңберінде бұдан былайғы шешімдер қабылдау үшін кеңістік сақталып отыр. Егер қаржы нарықтарында құбылмалылық артатынын көретін болсақ, біз қаржы тұрақтылығына нұқсан келтірместен, ақша-кредит талаптарын елеулі түрде күшейте аламыз», деді ол.
