Солардың бірі – жабылып қалған облыстарды қайта ашу. Бұл мәселені шешуді халқымыз ұзақ жылдар қозғап жүрді. Ол міне, шешімін тапты. Ашылғалы отырған облыстарға және оның орталықтарына тарихи атау беру туралы айтқан Президент пікірі халқымызды рухтандырды және теңдесі жоқ жаңалық болды.
Талдықорғаннан алыс елді мекендерге, Семей мен Жезқазған өңірінің тұрғындарының облыс орталықтарына барып қайтуы қиындап кетті. Алыс елді мекендерде жұмыссыздық пайда бола бастады. Бұл тарихи шешім. Біздер осы жұмыстың баянды болуына бір кісідей атсалысуымыз керек. Сондай-ақ Жолдауда «Күшті Президент, ықпалды Парламент, есеп беретін Үкімет» қағидатын басшылыққа аламыз, деді Президент.
Сонымен қатар Жолдауда айтылған бағыттарды іске асыру үшін Конституцияға 30-дан астам өзгеріс енгізілетінін және 20-ға тарта заңдар қабылдау керектігін атап өтті.
Мемлекет басшысы Қазақстанда жаңа Конституциялық сот құруды ұсынып, Адам құқықтары жөніндегі уәкіл қазіргі соттардың шешімімен келіспеген жағдайда, осы сотқа жүгінуге болатынын айтты.
Қ.Тоқаев елді басқарып отырған Президент партияға мүше болмауы керек деп, заңға тиісті өзгерістер енгізу керек екенін де атап өтті. «Қазір бәрі дерлік Президентке бағынған және бұл теріс нәрсе. Біртіндеп мұндай тәжірибеден кету керек. Мен үшін мемлекеттің ұзақмерзімді мүддесі биліктегі қосымша бір үстемдіктен артық. Сондықтан, Президент сайланған мерзімі ішінде партияға мүше болмасын деген өзгеріс енгізуді ұсынамын. Бұл саяси бәсекелестікті күшейтіп, барлық партиялардың дамуына жағдай жасайды», деді Қ.Тоқаев.
Сонымен қатар Президент заңға тиісті өзгеріс енгізе отырып, енді әкімдер мен олардың орынбасарлары партия филиалдарын басқаруды тоқтатуы керек деді. Енді әкімдерден бөлек Есеп комитетінің төрағасы, Орталық сайлау комиссиясының төрағасы сияқты өте маңызды қызмет атқаратын адамдар да партияға мүше болмайды.
Әбдәлі НҰРАЛИЕВ,
сенатор
