Қаңтар айында аударымдардың басым бөлігі, яғни 82,5 пайызы доллармен жасалған. Бір жыл бұрын бұл көрсеткіш 73,6 пайызды құраған екен. Ал бес жыл бұрын 61,4 пайызды құраған болатын. Рубльмен аударым жасау жылдан-жылға азайып келе жатыр. 2022 жылдың қаңтарында рубльдің үлесі 10,8 пайыз болған. Ұлттық валютамен аударымды жүзеге асыру соңғы бір жылда 11,9-ден 5,7 пайызға, ал еуромен қаржы жіберу 1,2-ден 1 пайызға төмендеген.
Ақша аударымы жүйесі арқылы Қазақстаннан жіберілген бір аударымның орташа чегі ұлттық валютада 142,7 мыңнан 140,6 мыңға азайған. Ресей рублінде – 59,8-ден 50,9 мыңға, еурода – 1 218-ден 1 155 еуроға қысқару байқалады. Ал долларда – 1 165-тен 1 355 долларға өскен.
Барлық аударымның тең жартысынан астамы үш елге тиесілі екен: Түркия (10,4 млрд теңге), Өзбекстан (9,3 млрд теңге) және Қырғызстан (8,3 млрд теңге). Сондай-ақ 7,2 млрд теңге Ресейге жіберілген, бірақ бұл сома былтырғыдан әлдеқайда аз және ол кезде Қазақстаннан ақша алудан Ресей көш бастап тұрған. Ал биыл алғашқы үштікке де кірмей қалғанын байқаймыз.
Бұл ретте, Қазақстан Республикасы қолма-қол шетел валютасын және 10 мың доллардан асатын шетел валютасындағы ақша құралдарын, сондай-ақ алтын құймаларын, инвестициялық монеталарды экспорттауға шектеу енгізгендіктен аударым танымалдылығы бұдан да арта түсуі мүмкін деп болжайды мамандар.
