![Аналар кеңесінің жаңа жобасы](/media/2022/03/30/49f3e7a1f7cd682b24a34f01b9cc5389_xl.jpg)
Ассамблея Төрағасының орынбасары – Хатшылық меңгерушісі Марат Әзілханов Аналар кеңесінің жұмысы туралы айта келе, халықтың түрлі топтарын мақсатты қамту үшін аналардың әлеуетін арттырудың маңыздылығына назар аударды.
– Ассамблеяның Аналар кеңестері саяси реформалар стратегиясын іске асыруға, елдегі бейбітшілік пен келісімді нығайтуға, азаматтық қоғаммен байланыс орнатуда еңбек етеді. Аналар кеңесі балалардың құқықтарын қорғау, суицидке жол бермеу, қоғамдағы зорлық-зомбылықты азайту, отбасылық-тұрмыстық қатынастар саласындағы құқық бұзушылықтардың алдын алу бойынша жұмыстарға белсенді араласуы керек. Біз ресми түрде «Мәдениетті ана – мәдениетті ұлт» жобасын іске асыруды бастаймыз. Жоба ажырасу, суицидтің алдын алу, саламатты өмір салтын дәріптеу, білім мен еңбексүйгіштікке баулу бойынша мемлекеттік органдармен, азаматтық қоғам институттарымен бірлесе жұмыс істейді, – деді М.Әзілханов.
Жаңа жобаны толығырақ таныстырған Қазақстан халқы Ассамблеясы республикалық Аналар кеңесінің төрайымы Назипа Шанай әр бағытқа жеке тоқталып, орталық пен жергілікті жерлерде өтетін іс-шараларды баяндады.
Отырыс барысында Ассамблеяның өңірлік Аналар кеңесінің жетекшілері сөз сөйлеп, этномәдени бірлестіктердің қолдауымен өңірлерде жүргізіліп жатқан жұмыстарға тоқталды.