Мәжіліс Төрағасы сайланды

Кеше түс қайта арнайы өткізілген жалпы отырыста үш мәселе қаралды. Депутаттар күн тәртібінде Мәжіліс Төрағасын, оның орынбасарын және палатаның Әлеуметтік-мәдени комитетінің басшылығына кандидаттарды сайлау мәселесін қарады. Парламент ғимаратына арнайы келген бұрынғы Мәжіліс Төрағасы, қазіргі Мемлекет басшысының Жарлығымен Президент Әкімшілігінің Басшысы болып тағайындалған Нұрлан Нығматулин палатадан өз өкілеттігін тоқтату туралы ұсынысын ортаға салды. Ол ұсыныс депутаттар тарапынан бірауыздан қолдау тапты. Бұдан кейін отырысты жүргізу Мәжіліс Төрағасының орынбасары Сергей Дьяченкоға табысталды. Вице-спикер өз кезегінде күн тәртібінде бірінші тұрған мәселе – Мәжіліс төрағалығына кандидатты сайлау екендігін жеткізді. Бұл лауазымға үміткерлер палата депутаттарының арасынан таңдалады. Ол мемлекеттік тілді еркін меңгеруі және жасырын дауыс беру арқылы жалпы депутаттар санының басым бөлігінің қолдауына ие болуы тиіс. Конституцияға сәйкес Мәжіліс Төрағасы лауазымына кандидатты депутаттар өздері ұсынатындықтан, бұл лауазымға Парламент Мәжілісінде көпшілік саналатын «Нұр Отан» партиясы фракциясының мүшесі Қуаныш Сұлтанов ұсыныс тастады. Депутат сөз ретінде Мәжі­ліс­тің бұрынғы Төрағасы атына жы­лы лебіздерін білдіре келіп, «Нұр Отан» партиясының фракциясы Мә­жі­ліс Төрағасы лауазымына осы кезге дейін Төраға орынбасары қызметін атқарып келген Қаби­болла Жақыповтың кандидатурасын ұсынатынын жеткізді. Аталған кандидатура бойынша өз пікірлерін білдірген Қазақстан халқы Ассамблеясының мүшесі Надежда Нестерова, «Халықтық коммунистер» фракциясының жетекшісі Владислав Косарев және Қазақстанның «Ақ жол» де­­мо­­кратиялық партиясы фрак­­циясының жетекшісі Азат Пе­руашев ұсынылған кан­ди­даттың саяси тәжірибесі мол екенін тілге тиек ете келіп, оның көппартиялы Пар­ламенттің өркендеуіне сүбелі үлес қосарына өз сенімдерін біл­дірді. Бұдан кейін депутаттардың жа­сырын дауыс беруі үшін ар­найы жарты сағаттық үзі­ліс жарияланып, есеп ко­мис­­­сиясының жеті мүше­сі жа­сақ­­талды. Есеп комис­сия­­сы­ның төрағасы депутат Асқар Базар­­баевтың мәлімдеуінше, жасы­­рын дауыс беру барысын­да Мә­жі­лістің 103 депутаты Қ.Жа­қы­повтың кандидатурасын қол­даған. Бұл кандидатураға бір де­путат қарсы болған. Мәжіліс Төрағасы Қабиболла Жақыпов орынбасарлық қыз­метке палатаның Әлеуметтік-мә­дени даму комитетінің төра­йы­­мы Дариға Назарбаеваны ұсын­­ды. Бұл ұсыныс депутаттар тарапынан қолдау тауып, бір­ауыздан қабылданды. Сондай-ақ, кеше Әлеуметтік-мәдени даму комитетінің төрағасына да кандидат ұсынылды. Депутат Майра Айсинаның ұсынысымен аталған тұрақты комитет төрайымдығына бұған дейін комитет хатшысы болып келген Гүлнар Ықсанова лайық деп табылды. Осылайша, кешегі жалпы отырыста депутаттар күн тәртібіне шығарылған үш мәселені де оң шешіп алды. Асқар ТҰРАПБАЙҰЛЫ, «Егемен Қазақстан».