Калифорниялық зейнеткер лотереядан 425 млн. доллар ұтып алды

АҚШ-та «Powerball» лотереясының 425,3 млн. доллар құраған джек-потын Калифорния штатының тұрғыны Рэймонд Бакстон ұтып алды. Бұл туралы Lenta.ru хабарлады. 20 жыл бойы лотерея билеттерін үзбей сатып алып жүрген калифорниялық зейнеткер ақыры күтпеген жерден ұтыс иесі атанды. Ал лотереяны ұйымдастырушылар болса, оған ұтысты 30 жылға бөліп беруге ұсыныс айтқан. Алайда, зейнеткер ақшаны бірден алуға ниет білдірген. Негізі, лотерея ережелеріне сай, мұндай жағдайда ұтыс толығымен емес, тек оның 242,5 млн. доллары беріледі екен. Сондай-ақ, бұл сомадан салық та ұсталатын көрінеді. «Мен бірнеше сағат бойы компьютердің алдында тапжылмай отырып, өз көзіме сенбей нөмірлерді қайта-қайта тексере беріппін. Одан соң бірнеше күн бойы ұйықтай алмадым», – дейді Р. Бакстон. Зейнеткер ұтқан ақшасының бір бөлігін саяхат жасауға жұмсайды. Сонымен бірге, ол қайырымдылық қорын ұйымдастырып, одан түскен қаражатты білім беру мен денсаулық сақтау салаларына жұмсауға ниетті екенін жеткізді. Айдар Өрісбаев. Дереккөз: Lenta.ru. Фото: www. News.nur.kz.