Тағзым етіп, ескерткіш орнатты

Қазақстан Республикасын­дағы Польша Республикасы елшілі­гінің ұйымдастыруымен үстіміздегі жылғы 3-6 сәуір аралығында Оңтүстік Қазақстан облысының Манкент және Жамбыл облысының Мерке елді мекендерінде орналасқан әскери зираттарға орнатылған ескерткіштердің ашылу рәсімі жоспарланған болатын. 3 сәуір күні кешке Польша Республикасының Соғыстар мен азап шеккендердің естеліктерін сақтау жөніндегі кеңесінің Бас хатшысы А.Кунерт бастаған 90 адам Шымкентке ұшып келді. Оларды облыс әкімінің орын­басары С.Қаныбеков бастаған өңір өкілдері қарсы алды. 4 сәуірде делегация басшысы Анджей Кунерт, сондай-ақ Польшаның Қазақстандағы елшісі Яцек Ключковский, Польшаның Алматыдағы Бас консулы Анджей Папеж, поляк-қазақ сауда палатасының өкілі Хмура Дариуш бастаған қонақтар, екінші дүниежүзілік соғыс кезінде Қазақстан аумағында болған соғыс ардагерлері және Оңтүстік Қазақстан облысының өкілдері 1942 жылы қайтыс болып, Манкентке жерленген поляктар зиратына орнатылған ескерткіштердің ашылуына қатысты. Жиынды А.Кунерт кіріспе сөз сөйлеп ашты. Я.Ключковский, А.Папеж, Оңтүстік Қазақстан облысы әкімінің орынбасары С.Қаныбеков, тағы басқалар өз пікірлерін айтып, бейітте жатқан марқұмдардың рухтарына тағзым етті, оңтүстікқазақстандықтарға алғыс айтты. Түстен кейін поляк де­ле­­га­циясы түркі дүниесінің текті төрі Түркістанға жол тартты. Қожа Ахмет Ясауи кесенесін, шаһардың көрікті жерлерін аралап көрді. Бүгін қонақтар Шақпақ­бабадағы және Меркедегі поляктар зираттарында болып, оларда орнатылған құлпытас ескерткіштерді ашып, шырақ жағады, гүлдестелер қояды. «Егемен-ақпарат».