Қазақстан • 11 Сәуір, 2022

Мұхтар Тілеуберді Еуропарламент делегациясын қабылдады

64 рет көрсетілді

ҚР Премьер-Министрінің орынбасары – Сыртқы істер министрі Мұхтар Тілеуберді «Қазақстан Республикасы – Еуропалық одақ» Парламенттік ынтымақтастық комитетінің 19-шы отырысына қатысу мақсатымен Қазақстанға келген Еуропалық парламент делегациясын қабылдады, деп хабарлайды Egemen.kz.

Делегация тобына Еуропалық парламенттің Орталық Азия және Моңғолиямен ынтымақтастық жөніндегі делегациясының бірінші орынбасары және ЕП көлік және туризм жөніндегі комитеті төрағасының орынбасары Андрис Америкс, ЕП халықаралық істер жөніндегі комитетінің мүшесі Франсиско Миллан-Мон, сондай-ақ ЕП бірқатар жетекші партиялық топтарының саяси кеңесшілері кірді.

«Еуропарламент делегациясының Қазақстанға сапары Қазақстан мен ЕО арасындағы Кеңейтілген әріптестік пен ынтымақтастық туралы келісім аясында саяси және парламентаралық ынтымақтастықты нығайтуға, ынтымақтастықтың жаңа перспективалық тауашаларын іздеуге қосымша серпін береді», деді Мұхтар Тілеуберді өз сөзінде.

Министр еуродепутаттармен ҚР Президентінің елдің саяси жүйесін жаңғырту және «Жаңа Қазақстанды» құру жөніндегі реформалар бағдарламасын талқылады.

Өз кезегінде А.Америкс Қазақстан - Еуропалық одақтың Орталық Азия өңіріндегі негізгі әріптесі екенін  атап өтті.

«Мен Қазақстанға екі жарым жыл бұрын келген едім, содан бері бұл ел тек өркендей түсті. Қазақстан мен Еуропалық одақ жақын серіктес болып қала береді. Біз елдегі саяси реформалар бағытын қолдаймыз және оның жүзеге асырылуын мұқият бақылаймыз», деді ол.

«Қаңтар трагедиясының» шынайы себептерін зерттеу тақырыбы Еуропарламенттің 2022 жылдың басында қабылданған Қазақстандағы адам құқықтарын сақтау жағдайы туралы қарары аясында да қозғалды.

«Қазақстан қаңтар айында тап болған жағдайдың күрделілігін түсінеміз және тергеудің ресми нәтижелерін күтеміз», деді Ф.Миллан-Мон.

ЕП делегациясының сапары аясында, парламентаралық ынтымақтастық комитеті отырысынан басқа, Нұр-Сұлтан және Алматы қалаларында Сенат мен Мәжіліс депутаттарымен, Қазақстандағы Адам құқықтары жөніндегі уәкілмен, ҚР құқық қорғау органдарымен, мемлекеттік органдардың экономикалық саласындағы және азаматтық қоғам өкілдерімен кездесулері жоспарланған.

Соңғы жаңалықтар

Доллар арзандады

Экономика • Бүгін, 16:42

Мұнай бағасы арзандады

Экономика • Бүгін, 13:23

Ұқсас жаңалықтар