Осы игі шаруаның басы-қасында жүрген Іскер әйелдер қауымдастығының төрайымы Айман Исина акцияның мақсаты Жезқазған қаласын көгалдандыру және тұрғындарды осы акцияға белсенді түрде атсалысуға тарту екенін айтады.
– «Наурыз» саябағында өткен акцияға 50-ден астам адам қатысты. Біз 28 қарағай мен 20-ға жуық үйеңкі көшетін отырғыздық, – дейді ол.
Айта кететін бір жайт, тал егушілер қарағай мен үйеңкі көшеттерінің күтімін өз мойындарына алмақшы. Сонымен қатар олар күзде де осынша ағаш отырғызғысы келетіндіктерін айтады.
Акцияға қатысушыларға көшеттерді сатқан кәсіпкердің өзі де көмекке келіпті. Ол ағаштарды қалай дұрыс суару және баптау керектігін егжей-тегжей түсіндірген. Сондай-ақ бұл игі істен қала тұрғындары да тыс қалмапты. Олардың көбі отбасы мүшелерімен келіп, ағаш отырғызу жұмыстарына белсене ат салысқан.
Жезқазғанды жасыл желекті қалаға айналдыруды мақсат еткен акция авторлары ағаш отырғызу челленджін жария еткен бетте оны қаладағы басқа ірі ұйымдар мен кәсіпорындар іліп әкетті.
Қарағанды облысы,
Жезқазған қаласы
