Қоғам • 13 Сәуір, 2022

Астана әкімдігі спортты дамытуға қосымша қаржы сұрап отыр

16 рет көрсетілді

Елордада спортты сапалы әрі кәсіби түрде дамыту үшін бюджеттен қосымша 15,9 млрд қаржы сұралып отыр, деп хабарлайды Egemen.kz Нұр-Сұлтан қаласы дене шынықтыру және спорт басқармасына сілтеме жасап.

«Қала бойынша біздің басқармаға бағынысты 17 спорт мекемесі жұмыс істейді. Оның ішінде 11-і - балалар мен жасөспірімдерге арналған спорт мектептері. Сонымен қатар олимпиадалық және олимпиадалық емес спорт түрлері бойынша спорт дирекциялары, олимпиада резервін даярлау орталығы, «Дәулет» спорт кешені және басқалар бар», деді Алмас Абаев қалалық мәслихаттың тұрақты комиссиясының отырысында.

Оның айтуынша, бүгінгі күні елордада  13 041 спортшы бар.

«Биыл 1 қаңтардағы бекітілген бюджетке сәйкес спортты дамытуға 11,3 млрд теңге қаралған. Оның ішінде мемлекеттік спорт тапсырысына - 1,3 млрд теңге. Қалған сома басқармаға бағынысты мекемелерге таралған. Осы орайда спортты сапалы әрі кәсіби түрде дамыта түсу үшін қосымша қаржы бөлуді сұраймыз. Атап айтқанда қалалық, республикалық, халықаралық спорт жарыстарына қатысу үшін және спортшылардың дайындық базасын жетілдіре түсу үшін қосымша қаражат керек. Онымен қоса спортшылардың жаттығу залдарын тиісті құрал-жабдықпен қамту мәселесі күн тәртібінде тұр. Осыған орай бюджеттен қосымша 15,9 млрд теңге бөлуді сұраймыз», деді Алмас Абаев.

Аяна Тоғанбек



Соңғы жаңалықтар

Алматы маңында жер сілкінді

Аймақтар • Бүгін, 16:18

Доллар 9 теңгеге арзандады

Қаржы • Бүгін, 16:10

Ұқсас жаңалықтар