Спорт • 14 Сәуір, 2022

Қарсыластарымыз – кіл мықтылар

263 рет
көрсетілді
1 мин
оқу үшін

Биыл жазда Мажарстанның Будапешт қаласында су спортынан өтетін әлем чемпионатында Қазақстанның ватерполшылары кімдермен кездесетіні белгілі болды.

Қарсыластарымыз – кіл мықтылар

Еліміздің ерлер құрамасы D тобында өнер көрсетеді. Қарсыластарымыз – АҚШ, Аустралия және Сербия. Осылардың арасындағы ең мықтысы сербтер екені сөзсіз. Олар соңғы бес Олимпия ойындарының барлығынан олжалы оралды. 2004 жылы Афинада күміс, 2008 жылы Бейжің мен 2012 жылы Лондонда қола алса, 2016 жылы Рио-де-Жанейро мен 2021 жылы Токиода топ жарды. Әлем чемпионатында екі мәрте дара шығып, тағы бірнеше рет жүлдегерлер қатарынан көрінді. АҚШ та өте азулы команда. Олар Олимпиадада тоғыз рет (1 алтын+4 күміс+4 қола) жеңіс тұғырына көтеріліп, басқа да байрақты бәсекелерде олжаға кенелді.

Әйелдер арасындағы сайыста С тобына түскен жерлестеріміз Бразилия, Аустралия және Жаңа Зеландиямен шеберлік байқасады. Бұл төрттіктің арасынан жасыл құрлық өкілдерін бөле-жара атауға болады. Олар Олимпия ойындарында бір алтын және екі қола медаль олжалаған.