Ел Президенті біршама уақыт бұрын жаңа Қазақстанды құруға ниетті екенін мәлімдегені баршамызға мәлім. Ал жаңа сипаттағы мемлекет қай кезде де елдің көкейкесті мәселелерін назардан тыс қалдырмауы қажет. Халықтың сұранысын қанағаттандыру – біз айтып отырған Жаңа Қазақстанның басты міндеті. Сондықтан да осы Жарлықтағы негізгі басымдықтар Жаңа Қазақстанды құрудың алғашқы қадамдарының нақты дәлелі деуге әбден болады.
Жарлық мемлекеттік аппарат жұмысының тиімділігін арттыратыны даусыз. Бірінші кезекте Қазақстан азаматтарының шағымдары мен ұсыныстары дер кезінде қаралып, уақтылы шешімін табатын болады. Елге де керегі осы. Салыстырмалы түрде айтатын болсақ, бұрын бұл процесс өте көп уақытты алғаны баршаға белгілі. Құжат атаулы бір қолдан өтіп, екінші бір қолға жетіп, содан кейін тағы басқа адамдардың қарауына түсіп жататын. Мұндай жағдай әрине, халыққа тиімсіз еді. Өйткені азаматтар алтынға бергісіз уақытын әр жерге бір жүгірумен жоғалтып жататын. Енді процесс жеделдетіліп, әр көшбасшы мәселелерді жоғарыға жолдап, қарап отыра бермей, белгілі бір деңгейде өзі шеше алады. Жарлық сонысымен де жұртшылыққа ыңғайлы болып тұр.
Әрине, зайырлы мемлекеттің бір қағидаты кез келген процесті жедел шешумен байланысты болса керек. Сол тұрғыдан алып қарайтын болсақ, Жарлық өз деңгейінде орындалған кезде біз өзіміздің зайырлы, құқықтық мемлекетте өмір сүріп жатқанымызды толыққанды сезіне түспекпіз. Тоқсан ауыз сөздің тобықтай түйіні сол, бұл заң ең бастысы, Қазақстан халқының көңілінен шығатындығына сенімім кәміл.
Есберген АЛАУХАНОВ,
Қазақстанның еңбек сіңірген қайраткері,
заң ғылымдарының докторы, профессор