Шығыс – елімізде сүт өндіруден көш бастап отырған өңір. Кейінгі жылдары сүт өндірудің инновациялық технологиясы аймақта кеңінен енгізіле бастады. Осыдан екі жыл бұрын Глубокое ауданының Бобровка ауылында іске қосылған роботтандырылған сүт сауу аппараты енді өзге шаруашылықтарға да шет емес. Жуырда Бородулиха ауданындағы «Е.Зәйтенов» шаруа қожалығының базасында толық автоматтандырылған мал шаруашылығы кешенінің ашылуына куә болдық.
Бұл шаруа қожалығы сиырды робот арқылы сауатын осы өңірдегі екінші шаруашылық. Елімізде жаңа технологияны бірінші рет енгізген Шығыс Қазақстан облысы инновациялық сауу аппаратының саны жағынан да көш бастауда.
Автоматтандырылған кешен мал шаруашылығындағы кірісті арттыруға үлкен мүмкіндік береді. Сәйкесінше, ондағы шығын көлемі айтарлықтай азаяды. Мәселен, роботтардың көмегімен әр сиырдан жылына 4,5 мыңнан 6,5 мың литрге дейін сүт алынбақ.
Шаруашылық жетекшісі Ерлан Зәйтеновтің айтуынша, автоматтандырылған фермада 30 сиыр сауылады. Алдағы уақытта желіні жер сызған ірі қара санын арттыру көзделіп отыр. Өйткені, автоматтандырылған кешенде іске қосылған төрт аппараттың қуаты 240 сиырды саууға еркін жетеді.
«Deleval» атты шведтік навигациялы-жылжымалы технологияның жұмыс істеу барысымен таныса келе, ферма қызметінің заманауи бағытта құрылғанын байқадық. Біріншіден, жабық кешеннің іші өте кең әрі жарық. Екіншіден, сүтті сиырларға жем-шөп сүрлемі мөлшерімен уақытында беріледі. Үшіншіден, малдың астындағы қалдықтар жылжымалы технология бойынша сыртқа шығарылып тұрады. Төртіншіден, малдың қиы арнайы сүзгіден өткен соң тыңайтқыш ретінде егістік алқаптарына жөнелтіледі. Бесіншіден, әр ірі қараға чип тағылған. Сауу уақыты келгенде чип арқылы компьютерлік орталыққа дабыл беріліп, желіні сыздаған сиыр аппарат жанындағы қоршауға кіргізіледі. Алтыншыдан, желінге сауу аппараты лазерлі автомат арқылы кигізіледі де, сауу жұмысы басталады.
– Мемлекет басшысы Нұрсұлтан Назарбаев ауыл шаруашылығы нысандарының заманауи жаңа технологиялармен жабдықталуы жөнінде нақты тапсырмалар жүктеген болатын. Бұл ауыл шаруашылығы өнімдерін арттыруға мүмкіндік береді. Елімізді азық-түлікпен отандық кәсіпкерлердің өздері қамтамасыз етуіне жол ашылуы тиіс. 300 миллион теңгеге жуық қаржы жұмсалған автоматтандырылған кешен алдағы уақытта бюджет қазынасын толтыруға да үлес қосады, – деді өңір басшысы Бердібек Сапарбаев.
Шаруа қожалығының аудан орталығында «Темірлан» атты өз дүкені бар. Дүкенде тұрғындар ауыл шаруашылығы өнімдерін көңілге қонымды бағамен сатып алады. Мысалы, 30 пайыз майлылықтағы қаймақтың жарты килосы – 270, 2,5 пайыздық пастерленген сүттің литрі – 120, 82 пайыздық сары майдың килосы – 1000, сиыр етінің килосы – 1000, балдың килосы – 800, бірінші сұрыптағы нан 45 теңгеден толып тұр. Сондай-ақ, «Е.Зәйтенов» шаруа қожалығы 100 миллион теңге көлеміндегі жеке қаржысы есебінен Семей қаласында әлеуметтік жағынан аз қамтылған отбасыларға арналған азық-түлік дүкені құрылысын жүргізбек.
Думан АНАШ,
«Егемен Қазақстан».
Шығыс Қазақстан облысы,
Бородулиха ауданы.
